Biyl sanavitsaiia qyzmeti 1 500 astam ushýdy oryndaǵan, dep habarlaidy "Ult aqparat" QR DSM baspasóz qyzmetine silteme jasap.
Sanitariialyq aviatsiia kúshterin tartý tek respýblika sheginde ǵana júzege asyrylmaidy, sonymen qatar shetelde aýyr jaǵdaida jatqan Qazaqstan azamattaryn nemese oralmandardy halyqaralyq tasymaldaýdy uiymdastyrý da júzege asyrylady.
2019 jyldyń 7 aiynda Qazaqstannyń sanitariialyq aviatsiiasy sheteldik klinikalardan otandyq meditsinalyq uiymdarda emdelýdi jalǵastyrý úshin 15 qazaqstandyqty tasymaldady.
2011 jyldan bastap qazirgi ýaqytqa deiin QR sanitariialyq aviatsiiasy taiaý jáne alys shetelderden (Tailand, Túrkiia, Shveitsariia, AQSh, Ońtústik Koreia, Egipet, Qyrǵyzstan, Qytai Halyq Respýblikasy, Resei Federatsiiasy jáne t.b.) 74 qazaqstandyqty tasymaldady.
Sanitarlyq aviatsiia QR Ulttyq shuǵyl meditsinany úilestirý ortalyǵyna (UShMÚO) jatady. Jyldyń basynan beri UShMÚO 1 513 ushýdy júzege asyrdy. Sondai-aq, ortalyq qurylǵannan beri 15 498 ushýdy oryndaǵan.
«Shalǵai aýdandarynda turatyn halyqqa ýaqytyly jáne sapaly meditsinalyq kómekti qamtamasyz etý maqsatynda, patsienttiń ornalasqan jeri boiynsha meditsinalyq uiymda meditsinalyq jabdyqtyń nemese tiisti biliktiligi bar mamandardyń bolmaýy saldarynan mundai kómek kórsetý múmkin bolmaǵan jaǵdaida UShMÚO sanitariialyq aviatsiia nysanyndaǵy kúshteri tartylady. Shuǵyl meditsinalyq kómek kórsetý qajettiligi týyndaǵan jaǵdailarda sanitariialyq aviatsiia oǵan muqtaj árbir adamǵa onyń ornalasqan jerine jáne marshrýtynyń qiyndyǵyna qaramastan, áýe kóligin paidalana otyryp, barynsha jyldam jáne sapaly meditsinalyq kómek kórsetýge arnalǵan», delingen habarlamada.
Biylǵy 7 aiynyń qorytyndysy boiynsha ortalyq mamandary 1 855 patsientke meditsinalyq kómek kórsetti, 2 094 meditsinalyq qyzmet oryndaldy, onyń ishinde: 1 377 patsientterdi tasymaldaý (65,8%), 290 konsýltatsiia berý (13,8%) jáne 132 operatsiia (6,3%) jáne 295 telemeditsina rqyly konsýltatsiia berý (14,1%).
2019 jyldyń basynan beri sanaviatsiia 6 ret donorlyq organdardy áýe arqyly jetkizgen.
Sanitariialyq aviatsiia jaraqat, jazataiym oqiǵa men ýlaný (22,9%), balalardyń patologiiasy (22%), qan ainalymy júiesiniń aýrýy (20,4%), jańa týǵan náresteniń patologiiasy (14,1%), akýsherlik-ginekologiialyq patologiia (12,5%) jáne basqa aýrýlar (8,1%) boiynsha shuǵyl meditsinalyq kómek kórsetedi.
