Jyl basynan beri ishki ister organdarynyń qyzmetkerleri 5 300 esirtki zańbuzýshylyǵyn anyqtady jáne 12,5 tonna ártúrli esirtki tárkiledi, dep habarlaidy QazAqparat.
«Jyl basynan beri ishki ister organdarynyń qyzmetkerleri 5 300 esirtki zańbuzýshylyǵyn anyqtady, onyń ishinde 1661 qylmystyń 991-i asa iri kólemde esirtkini ótkizý jáne 270-i – saqtaý faktisi bolǵan. Jalpy salmaǵy 12,5 tonna ártúrli esirtki tárkilendi, onyń ishinde: 4 kg geroin, 129 kg sintetika, 371 kg gashish jáne 8,7 tonna marihýana bar», - dedi QR IIM esirtki qylmysyna qarsy is-qimyl departamentiniń basqarma bastyǵy Baqytjan Ámirhanov ministrlik uiymdastyrǵan brifingte.
Onyń aitýynsha, 24 tamyzda Jambyl oblysy Shý aýdanynda Baizaq aýdanynyń 49 jastaǵy turǵyny jalpy salmaǵy 928 kg kannabis ósimdikterin daiyndaý kezinde ustalǵan.
Sondai-aq, 7 uiymdasqan qylmystyq top taratylyp, olardyń basshylary men qatysýshylaryna qatysty 13 qylmystyq is qozǵaldy. Qylmystyq toptardyń 7 kóshbasshysy men 34 qatysýshysy jaýapqa tartylady.
«Esirtki kontrabandasynyń 81 faktisi anyqtaldy. Mysaly, Qaraǵandy oblysynda uiymdasqan qylmystyq top qyzmetiniń joly kesildi, 2020 jylǵy tamyzdan bastap internet-resýrstar arqyly sintetikalyq esirtkilerdi bailanyssyz ótkizýmen ainalysqan jetekshi men 7 adam ustaldy. Qylmystyq topqa qatysty QR QK 297, 262-baptary 1 jáne 2-bólimderi boiynsha, sondai-aq QR QK 264-baby «Transulttyq uiymdasqan qylmystyq top» boiynsha halyqaralyq qylmystyq bailanystary boiynsha da qylmystyq ister qozǵaldy», - deidi B. Ámirhanov.
Vedomstvonyń málimetinshe, 7 tamyzda jedel-izdestirý sharalary arqyly 37 jastaǵy azamat ustaldy, ony jeke tintý kezinde 2 paket «gashish» tárkilengen.
«Qyzmettik-izdestirý itimen tintý barysynda ustalǵan adamnyń turǵylyqty jeri – Qosshy qalasynda salmaǵy 34 keliden asatyn «gashish» salynǵan 2 polietilen paket tárkilendi. Ustalǵan azamat tárkilengen esirtkini Astana aýmaǵynda ótkizýdi kózdegen. Júrgizilgen arnaiy operatsiianyń nátijesinde 36 kilogramnan astam «gashish» zańsyz ainalymnan alyndy, bul 73 myńnan astam bir rettik dozany quraidy», - dedi IIM basqarmasynyń bastyǵy.
