Saýd Arabiiasy Koroldiginiń densaýlyq saqtaý ministrligi 2021 jylǵy qajylyq maýsymyna daiyndyq sheńberindegi arnaiy talaptardy jariialady, dep habarlaidy "Ult aqparat" Qazaqstan musylmandarynyń dini basqarmasyna silteme jasap.
Osy rette álemdegi pandemiialyq jaǵdaidaǵy «Qajylyq-2021» maýsymyndaǵy Saýdiia tarapynyń negizgi talaptaryna nazar aýdarý qajet:
- Biylǵy qajylyq maýsymyndaǵy qajylar sany 60 myń adam dep belgilengen.
- Qajylyq jasaýǵa 18-60 jas aralyǵyndaǵy azamattar ótinish bere alady.
- Saýd Arabiiasynda resmi bekitilgen vaktsina túrleriniń (Pfizer-BioNTech, AstraZeneca, Johnson&Johnson jáne Moderna) eki dozasyn qabyldaý talap etiledi. Ekinshi dozany koroldikke barýdan 14 táýlik buryn qabyldaýy tiis.
- Shet elderden kelgen kisilerge qajylyq qulshylyǵyna qatysy joq ózge aimaqtarǵa barýyna tyiym salynady.
Sonymen qatar, ár qajy joǵaryda atalǵan vaktsinalardyń birin qabyldaǵany týraly óz eliniń quzyretti organdarynan anyqtama alýy jáne ony Saýd Arabiiasynyń shet memleketterdegi elshilikterinde zańdastyrýy kerek.
Buǵan qosymsha ár qajydan Koroldikke kelgen kezde 72 saǵatqa jaramdy teris nátijeli PTR-test anyqtamasyn da kórsetý talap etiledi.
Qajylar Mekke aimaǵynda bir orynnan ekinshi orynǵa kóshken ýaqytta barlyq densaýlyq saqtaý sharalaryn qatań saqtaýy tiis. Sondai-aq bekitilgen erejelerge tolyq baǵyný qajet.
Alaida «Qajylyq-2021» maýsymynda qandai memleketten qansha adam shaqyrylatyny jaily jańalyqty Saýdiia biligi ázirge taratpai otyr.
Qajylyq maýsymyna qatysty jańa aqparattar men qosymsha talaptar bolǵan jaǵdaida qosymsha habarlanady.
