Foto: Viktor Fediýnin/Kazinform
Jyl basynan Parlament qaraýyna túsken zańdardyń ishinde úsheýi taza qazaq tilinde ázirlengen. Bul týraly depýtat Abzal Quspan Túrkistan qalasynyń erekshe mártebesi týraly zań jobasyn talqylaý kezinde aitty, dep habarlaidy Ult.kz Kaziform-ǵa silteme jasap.
— Bul zańnyń birneshe ereksheligi bar. Byltyr áriptesimiz Únzila Shapaqqyzy Úkimetke úlken depýtattyq saýal joldady. Sonda qazaq tilinde zań qabyldaý qajettigi, qoldanystaǵy zańdardyń qazaq tilindegi nusqasyn qaitadan reviziia jasaý týraly másele kótergen. Sol saýalǵa Úkimet basshysynyń orynbasary 2024 jyly qazaq tilinde zań daiyndaýdy bastaityndaryn aityp, jaýap qatqan, — dedi ol Májilistiń jalpy otyrysynda.
Depýtattyń aitýynsha, Úkimet ol ýádesin ishinara oryndaǵan.
— Bul Túrkistan qalasynyń erekshe statýsy týraly biyl Májiliske taza qazaq tilinde ázirlenip túsken úsh zańnyń bireý. Bireýi — norma shyǵarmashylyq týraly zań, ekinshisi — arhiv isi týraly zań bolatyn. Endi úshinshisi — búgin qarastyryp otyrǵan Túrkistan qalasynyń erekshe statýsy týraly zań, — dedi Abzal Quspan.
Aita keteiik, atalǵan qujat aiasynda Qoja Ahmet Iassaýi kesenesinen 100 metr radiýsta biik ǵimarat salýǵa zańmen tyiym salynbaq.
