2021 jyly qurban shalý rásimin ótkizý eki jolmen júzege asyrylady. Bul týraly Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly aityp berdi, dep habarlaidy QazAqparat.
«2021 jyly qurban shalý rásimin ótkizý eki jolmen júzege asyrylady. Birinshi joly: memlekettik sanitarlyq-epidemiologiialyq qadaǵalaý organdary tarapynan ruqsat berilgen jergilikti qasaphanalarda sanitarlyq erejelerdi qatań saqtai otyryp «sary» jáne «jasyl» aimaqtarda onlain jáne oflain formatta ótkizý.
Ekinshi joly: elimizdiń «qyzyl» aimaqtarynda pandemiia jaǵdaiynda ótken jyldyń tájiribesin qoldanyp, qurban shalý rásimin shariǵattaǵy «ókildik» qaǵidasyna sáikes qurban2021.kz saity arqyly tek onlain rejimde júzege asyrý», - dedi Naýryzbai qajy Taǵanuly Ortalyq kommýnikatsiialar qyzmetinde ótken baspasóz máslihatynda.
Bas múftidiń aitýynsha, qurban2021.kz saity búgin saǵat 15:00-de iske qosylyp, Qurban aittyń úshinshi kúni iaǵni 22-shi shildege deiin jumys isteidi. Qurban shalýǵa niet etken azamattar osy aralyqta tapsyrystaryn bere alady.
qurban2021.kz saity arqyly respýblika boiynsha muqtaj otbasylar qurbandyq etin alý úshin 17 shildeden bastap ótinish bildire alady. Muqtaj otbasylardyń ótinishterin qabyldaý, saraptaý jáne qurbandyq etterin jetkizip berý jumystarymen QMDB-nyń jergilikti ókildikteri jáne eriktiler ainalysady.
«Aýyldyq jerde jeke turǵyn úide turatyn ár adamnyń musylmandyq mindetin atqarýyna QMDB tarapynan eshqandai shekteý joq ekenin jetkizemiz», - dedi Naýryzbai qajy Taǵanuly.
