Biyl Qazaqstannyń ishki jalpy ónimi 3,5 paiyz ósti. Bul týraly Senattyń jalpy otyrysynda QR Ulttyq banki tóraǵasy Erbolat Dosaev aitty, dep habarlaidy QazAqparat tilshisi.
«2022-2024 jyldarǵa arnalǵan respýblikalyq biýdjetti qalyptastyrý maqsatynda daiyndalǵan áleýmettik-ekonomikalyq damý boljamy álemdik jáne ulttyq ekonomikalardy belsendi qalpyna keltirý dinamikasyna súienedi. Memleket basshysynyń iske asyrylyp jatqan daǵdarysqa qarsy bastamalary qysqa merzimde ulttyq ekonomikany pandemiiaǵa deiingi deńgeige qaitarýǵa múmkindik berdi. Biylǵy jylǵy 10 aidyń qorytyndysy boiynsha, munaidyń ortasha baǵasy bir barrel úshin 70 AQSh dollary bolǵan kezde Qazaqstannyń ishki jalpy óniminiń ósýi 3,5 paiyz boldy. Bul serpin Qazaqstan ekonomikasyn damytýdyń optimistik stsenariiine sáikes keledi, bul rette Ulttyq bank ishki jalpy ónimniń 2021 jyly 3,7-4,0 paiyz deńgeiinde ósýin kútedi», - dedi «2022-2024 jyldarǵa arnalǵan respýblikalyq biýdjet týraly» baiandaǵan Erbolat Dosaev.
Onyń atap ótýinshe, álemdik jáne ulttyq ekonomikalardyń osyndai tez qalpyna kelýi jalǵasyp kele jatqan fiskaldyq yntalandyrý baǵdarlamalary men jeńil aqsha-kredit talaptarynyń nátijesinde múmkin boldy.
Sonymen qatar, bul faktorlar tutynýshylyq suranystyń qalpyna kelýine jáne álemde infliatsiialyq qysymnyń aitarlyqtai ósýine alyp keldi.
«Osy jyldyń basynan beri baǵanyń ósýi tarihi eń joǵary kórsetkishterdi jańartýda. Álemniń iri ekonomikalarynda infliatsiia jańa eń joǵary kórsetkishterge jetti: AQSh-ta ol 30 jyldyq eń joǵary kórsetkish 6,2 paiyzǵa deiin, Eýroodaqta 4,1 paiyzǵa deiin jetti. Joǵary infliatsiialyq qysym jaǵdaiynda AQSh Federaldy rezervtik júiesi men Eýropa Ortalyq banki yntalandyrý is-sharalaryn qysqarta bastady. Qyrkúiekte Eýropa Ortalyq banki obligatsiialardy satyp alý kólemin qysqartý nieti týraly jariialady. AQSh-tyń Federaldy rezervtik júiesi biylǵy jylǵy 3 qarashada osy jylǵy jeltoqsannan bastap ai saiyn 15 mlrd AQSh dollaryna sandyq jeńildetý baǵdarlamasynyń qysqartyla bastaǵany týraly jariialady. Reseide infliatsiia boiynsha 8,1 paiyz deńgeiindegi 5 jyldaǵy eń joǵary kórsetkish aiasynda Ortalyq bank negizgi stavkany belsendi túrde kóterýge kiristi – ol biylǵy jyldyń basynan bastap 7,5 paiyzǵa deiin 3,25 paiyzdyq tarmaqqa jinaqtalyp kóterildi. Qazaqstanǵa ákelinetin taýar importyndaǵy Reseidiń úlesi 2020 jyldyń qorytyndysy boiynsha 35,4 paiyzdan osy jylǵy 9 aida 41,1 paiyzǵa deiin ulǵaiǵanyn eskere otyryp, Qazaqstandaǵy baǵalarǵa syrtqy qysym ósti», - dedi UB tóraǵasy.
