2021 jyldyń qorytyndysy boiynsha elimizde 842 myń kiik bar. Sondai-aq, quzyrly mekeme ókilderi Qazaqstanda albinos quralai týdy degen jaitqa qatysty túsinik berdi, dep habarlaidy QazAqparat.
Ótken aptada qazaqstandyqtar áleýmettik jelide albinos quralaidyń videosyn tarata bastady. Keiin anyqtalǵandai, video birneshe jyl buryn Reseide túsirilgen. Bul aqparatty Ekologiia, geologiia jáne tabiǵi resýrstar ministrligi rastap otyr.
Atalǵan jaitqa qatysty «Ohotzooprom» respýblikalyq mekemesiniń bólim basshysy Azamat Aqaev túsinik berdi.
«Birinshiden, jelide taralǵan video Qazaqstanda túsirilmegen. Ekinshiden, albinizm — kópke belgili qubylys. Iaǵni tól áppaq bolyp týady, ol sebep genniń buzylýy. Sol siiaqty albinos ǵylymmen dáleldengen sirek kezdesetin qubylys», - dedi ol.
Mamannyń aitýynsha, kiikterdiń tóldeýi jyl saiyn sáýirdiń sońynan mamyrdyń ortasyna deiin jalǵasady.
«Biz jyl saiyn kiikterdiń esebin júrgizemiz. Búginge deiin elimizde albinos kiik tóliniń týý jaǵdaiy tirkelmedi. Qazaqstanda keń taraǵan úsh kiik túri bar. Ol ústirt kiikteri, Betpaqdala jáne Oral kiikteri. Ótken jyldyń esebi boiynsha elimizde 842 myń kiik bar. Biyl atalǵan kórsetkish arta túsedi degen úmittemiz. Shamamen 1,2 mln kiikke jetedi degen boljam bar. Jalpy álem boiynsha kiikterdiń 90 paiyzy bizdiń elimizge tiesili», - deidi A. Aqaev.
Jyl saiyn kiikter esebi olar tóldep bolǵannan keiin júrgiziledi. Al onyń qorytyndysy jyl sońynda daiyn bolady.
«Kiikter tóldep jatqanda kedergi keltirýge bolmaidy. Iaǵni olardy mazalamaý kerek. Sol siiaqty kiikterge sanaq júrgizý ǵylymi uiymdar bekitken ádiske sáikes júzege asyrylady. Sanaq negizinen tikushaqtyń kómegimen júrgiziledi. Kiikterdiń tóldeý protsesin quzyrly organdar jáne salalyq ǵylymi mekemelerdiń ókilderi men mamandary qadaǵalaidy. Jaǵdaidy jyl boiy zerdelep, jyl aiaǵynda onyń qorytyndysyn shyǵarady», - dedi maman.
«Ohotzooprom» ókiliniń málimdeýinshe, elimizde jyl sanap kiikterdiń kóbeiýi baiqalady.
«Baqylaý men qabyldanyp jatqan sharalarǵa qaramastan brakonerlik faktiler bar. Bizdiń inspektorlar kiik aýlaýshylarmen kúresti táýlik boiy júrgizedi. Kiik aýlaý – ol qylmys. Qylmystyń aldyn alý maqsatynda quzyrly organdarmen birlesip tiisti sharalar qabyldanyp, qoldanysqa enip jatyr», - deidi Azamat Aqaev.
