«Halyqaralyq qatynastardyń qazirgi zamanǵy júiesindegi Qazaqstan Respýblikasy» atty halyqaralyq konferentsiia barysynda QR Syrtqy ister ministri Muhtar Tileýberdi biyl elimizde ótetin halyqaralyq is-sharalardy atady, dep habarlaidy QazAqparat.
«Biyl qazaq diplomatiiasy úshin halyqaralyq oqiǵalar óte kóp. Qyrkúiek aiynda Qazaqstan elordamyzda 2003 jyldan beri ótkizilip kele jatqan Álemdik jáne dástúrli dinder liderleriniń 7-sezin qabyldaýǵa daiyndalýda. Qazaqstan toleranttylyq, ózara túsinistik jáne mádeni ártúrlilik ideologiiasyn nasihattaý óshpendilik pen kemsitýshilikke qarsy kúrestiń kilti ekenine senimdi. Búginde Qazaqstan beibitshilik pen kelisimde ómir súrip jatqan 18 konfessiia men 100-den astam etnos ókilderin biriktiretin 3800-den astam dini birlestikter úshin qaýipsiz jáne jaily meken bolyp sanalady», - dedi ministr.
Onyń dereginshe, qazan aiynda Nur-Sultan qalasynda ótetin, qazaqstandyq bastamanyń 30 jyldyǵyna orailastyrylǵan Aziiadaǵy ózara is-qimyl jáne senim sharalary keńesiniń 6-shy sammitine daiyndyq júrip jatyr.
«Qazaqstannyń AÓSShK-ge qazirgi tóraǵalyǵy aiasynda AÓSShK-ti halyqaralyq uiymǵa ainaldyrýdy bastaý basty basymdyq bolyp sanalady. Qazaqstannyń 2022-2024 jyldarǵa BUU-nyń Adam quqyqtary jónindegi keńesine sailanýy bizdiń memlekettiń ulttyq jáne halyqaralyq deńgeide adamnyń negizgi quqyqtary men bostandyqtaryn ilgeriletý jónindegi mindettemesin rastaidy. Elimiz BUU-nyń adam quqyqtaryn qorǵaý salasyndaǵy barlyq irgeli qujattary men konventsiialaryna qosyldy. Adam quqyqtary salasyndaǵy ulttyq zańnamany halyqaralyq standarttarǵa sáikestendirý boiynsha jumys turaqty negizde júrgizilýde», - dedi Muhtar Tileýberdi.
