Búgin QR Premer-Ministri Baqytjan Saǵyntaevtyń tóraǵalyǵymen ótken Úkimet otyrysynda bilim jáne ǵylym ministri Erlan Saǵadiev bilim berýdi jáne ǵylymdy damytýdyń 2016–2019 jyldarǵa arnalǵan memlekettik baǵdarlamasynyń osy jyldyń I jarty jyldyǵynda iske asyrylý barysy týraly baiandady, dep habarlaidy "Ult aqparat" primeminister.kz portalyna silteme jasap.
2018 jylǵa 8 indikator, 52 kórsetkish, 148 is-sharany oryndaý kózdelgen. QR bilim jáne ǵylym ministri E. Saǵadievtiń aitýynsha, barlyq indikatorlar men kórsetkishter oryndalyp jatyr.
Qazirgi kezde 3–6 jastaǵy balalardy mektepke deiingi bilim berýmen qamtý 93%-dy quraidy. Osy jyldan bastap 25 qala men 6 aýdanda balabaqshalarǵa elektrondy túrde joldama berý iske qosyldy. Jyl sońyna deiin barlyq oblystar atalǵan júiege kóshedi.
Elektrondy úkimet pen «E-ákimdiktiń» integratsiiasy arqyly joldama berý protsesi avtomattandy.
Orta bilim berýde jańartylǵan mazmunǵa kóshý jalǵasýda. Ótken jyldan bastap 1, 2, 5, 7-shi synyptar jańa oqý baǵdarlamasy men oqýlyqtar negizinde bilim alyp jatyr.
Qyrkúiekten bastap 3, 6, 8-shi synyptar jańartylǵan mazmun boiynsha oqýǵa kóshedi.
«Osy jyldyń sońyna deiin balalardyń 75%-y jańartylǵan bilim berý mazmuny boiynsha oqidy, eki jylda shamamen 150 myń muǵalim jańartylǵan baǵdarlamalar boiynsha kýrstardan ótti», — dedi E. Saǵadiev.
Biyl taǵy 73 myń pedagog oqyp jatyr. Memleket basshysynyń tapsyrmasyna sáikes jańartylǵan mazmun boiynsha sabaq beretin 205 myń (67%) muǵalimniń jalaqysy 30%-ǵa kóbeidi. Pedagogtardy attestattaýdyń jańa júiesi engizildi. Attestatsiialaýǵa 60 myńǵa jýyq pedagog qatysty, olardyń ishinen 36 myńnan astamy attestatsiiadan ótti (63%).
Ministrdiń aitýynsha, jan basyna qarjylandyrý normativi bekitildi. Ol Astana qalasynda tolyǵymen 74 memlekettik jáne 11 jekemenshik mektepte biyl 1 qyrkúiekten bastalady. Sonymen qatar, atalǵan jumys Shymkent qalasynda da bastaldy.
Bilim jáne ǵylym ministrliginiń derekterine sáikes, respýblikalyq biýdjet esebinen jyl saiyn 110-nan 170-ke deiin mektep salynady.
Tehnikalyq jáne kásiptik bilim berý salasynda, Elbasynyń tapsyrmalaryna sáikes, memlekettik bilim berý standarttary tolyǵymen jańartyldy jáne barlyq mamandyqtar boiynsha 245 modýldik baǵdarlamalar ázirlendi. Kolledjderge baǵdarlama mazmunyn jumys berýshiniń talaby boiynsha 50%-ǵa deiin jáne qosarly bilim berý kezinde 80%-ǵa deiin ózgertýge múmkindik berildi.
Halyqaralyq talaptarǵa, sonyń ishinde WorldSkills standarttaryna sáikes jańa bilim berý baǵdarlamalaryna kezeń-kezeńimen kóship jatyrmyz. Qazirgi tańda 170-ten astam jańartylǵan baǵdarlamalar daiyn, jyl sońyna deiin taǵy 70 baǵdarlama daiyn bolady.
Bilim berý vedomstvosy basshysynyń aitýynsha, erekshe bilim berý qajettiligi bar adamdarǵa tehnikalyq jáne kásiptik bilimge erkin qol jetkizý boiynsha jol kartasynyń jobasy ázirlendi.
Joǵary jáne joǵary oqý ornynan keiingi bilim berýde jumys básekege qabiletti kadrlardy daiyndaýǵa, bilim, ǵylym jáne innovatsiiany integratsiialaýǵa baǵyttalǵan. Memlekettik JOO-lardyń rektorlaryn taǵaiyndaý kezinde ashyqtyq pen basty talaptar saqtalýda. Ashyq konkýrs arqyly 19 rektor taǵaiyndaldy. Álemniń úzdik ýniversitetteriniń QS WUR reitingisine 2018 jyly 10 qazaqstandyq JOO endi.
Prezidenttiń Bes áleýmettik bastamasyn iske asyrý aiasynda biyl memlekettik tapsyrys kólemi 20 myń orynǵa artty. 2022 jylǵa deiin stýdentter jataqhanalarynda 75 myń oryn ázirleý josparlanǵan. Búginde ákimdikter 140 jer teliminiń bar ekenin rastady.
«2018–2020 jyldarǵa arnalǵan ǵylymi-zertteý jumystary ǵylymdy damytatyn jeti basymdyq aiasynda oryndalýda. ǴZTKJ-dy qarjylandyrýdyń jalpy kóleminde tájiribelik-konstrýktorlyq jumystarǵa arnalǵan shyǵyndar úlesi 25%-ǵa jýyq qurady, jospar boiynsha 22% bolǵan. 2018–2020 jyldary granttyq qarjylandyrý boiynsha 1 myńnan astam ǵylymi joba jáne ǵylymdy nysanaly qarjylandyrý boiynsha 92 baǵdarlamanyń oryndalýy bastaldy», — dep túiindedi E. Saǵadiev.
Bilim berýdi jáne ǵylymdy damytýdyń memlekettik baǵdarlamasyn iske asyrý máselesin qaraý barysynda Almaty oblysynyń ákimi A. Batalov, Pavlodar oblysynyń ákimi B. Baqaýov, Mańǵystaý oblysynyń ákimi E. Toǵjanov baiandama jasady.
