Biyl qara metallýrgiia salasynda 6 joba iske qosylady. Bul týraly búgin halyqqa esep berý kezdesýinde QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Memleket basshysy óz Joldaýynda óńdeýshi ónerkásiptiń ósimin 2025 jylǵa qarai 1,5 esege jetkizýdi tapsyrdy. Bul nominaldy mánde alǵanda saladaǵy jyl saiynǵy ósim ortasha 10 paiyz bolatyndyǵyn kórsetedi. Mindet «Nur-Otan» partiiasynyń sailaýaldy tuǵyrnamasyna da engizilgen. 2021 jylǵa óńdeý ónerkásibiniń naqty kólem indeksiniń 2020 jylǵa qaraǵanda 5,8 paiyzǵa ósimi josparlanǵan. Qara metallýrgiiada biyl naqty kólem indeksiniń deńgeii 105 paiyz bolyp belgilengen», - dedi ol.
Onyń atap ótýinshe, biyl ferroqorytpa óndirisi 10,5, bolat óndirisi 17 jáne prokat óndirisi 19 paiyzǵa artady dep josparlanǵan. Munda negizgi mindet «ArselorMitall Temirtaý» men «Qazhrom» kásiporyndaryna júkteledi.
«Biyl biz Qaraǵandy, Jambyl, Shyǵys Qazaqstan oblystary men Shymkent qalasynda qosymsha 6 jobany iske qosamyz. Bul jobalar ferroqorytpalar, qurylys armatýralary, bolat dánekerlengen qubyrlar jáne basqa da metall ónimderi óndirisiniń kólemin ulǵaitýǵa múmkindik beredi», - dedi Beibit Atamqulov.
