Nur-Sultan qalasynda 15 elektrobýs jolaýshylar tasymalymen ainalysady, dep habarlaidy QazAqparat.
«Qazirdiń ózinde qala ishinde 15 elektrobýs halyqqa qyzmet kórsetip júr. Jaqynda ǵana taǵy 25-iniń partiiasy keldi. Olardy jabdyqtaý jumysymen ainalysyp jatyrmyz. Atap aitqanda, olarǵa elektrondyq júie boiynsha tóleý quraly ornatylýda. Olar da jaqynda jolǵa shyǵarylady», - dedi City Transportation Systems (burynǵy «Astana LRT») kompaniiasynyń basshysy Bekmyrza Igenberdinov «Elordadaǵy qoǵamdyq kólik keshenin damytý: keshe, búgin, erteń» atty kórme-konferentsiiasynan keiin tilshilerge.
Kompaniia basshysy naýryz aiynyń sońyna deiin elordaǵa taǵy birshama elektrobýs ákelinip, olardyń jalpy sany 100-ge jetkiziletinin aityp ótti.
«Avtobýs parkterin árdaiym jańartyp otyrýdy kózdeimiz. Sebebi qala ósip, halyq kóbeiip kele jatqannan keiin qosymsha avtobýstardy satyp alý kerek bolady. Jyl saiyn shamamen 100-200 avtobýs qosylyp otyrý kerek», - dedi ol.
Eske sala ketsek, búgingi kórme-konferentsiia barysynda Bekmyrza Igenberdinov elordada kámeletke tolmaǵan balalar qalaishilik qoǵamdyq kólikpen tegin júretinin habarlaǵan edi. Sonymen qatar halyqtyń alty sanatyna kiretin azamattarǵa qala mańy baǵdary boiynsha qoǵamdyq kólik tegin bolady. Ol alty sanattyń ishine zeinetkerler, múgedekter, soǵys ardagerleri, múgedekterdi alyp júrgen adamdar, kópbalaly analar jáne kópbalaly otbasylardyń músheleri kiredi.
