Búgin Nur-Sultan qalasynyń ákimi Baqyt Sultanov jáne QR Eńbek jáne halyqty áleýmettik qorǵaý ministri Berdibek Saparbaev elordanyń az qamtylǵan jáne kópbalaly otbasylarymen kezdesti, dep habarlaidy QazAqparat tilshisi.
«Az qamtylǵan jáne kóp balaly otbasylardy tolǵandyratyn basty máselelerdiń biri - turǵyn úi. Búginde bas qalada 45 myń adam turǵyn úi kezeginde tur, onyń 20 myńy az qamtylǵan, kópbalaly jáne múgedek múshesi bar otbasylar. Al, 22 myńy memlekettik jáne biýdjet qyzmetkerleri. Qazirgi ýaqytta osy tizimdegilerdiń 188-ine páter berildi, jalpy jospar boiynsha biyl 781 páter berilýi tiis, biraq budan bólek jyl sońyna deiin áleýmettik jaǵynan osal topqa jatatyn otbasylarǵa qosymsha qarjylandyrý esebinen taǵy 1 800-1 900 páter beriledi», - dedi Baqyt Sultanov.
Qala basshysynyń aitýynsha, atalǵan maqsatqa biýdjetten 1,3 trln teńge qajet.
«Turǵyn úiden bólek búginde biýdjetten 8 mlrd teńge qarjy bólinip, ol 13 túrli áleýmettik sharalarǵa jumsalýda. Mysaly, múgedekter men olardyń asyraýshylarynyń qoǵamdyq kólikterde tegin júrýi engizilýde, odan bólek kópbalaly jáne az qamtylǵan otbasylardan shyqqan 1-11 synyp oqýshylary osy jyldyń 1 qyrkúieginen bastap mektepte tegin ystyq tamaqpen qamtylady. Bizde buǵan deiin tek qana bastaýysh synyp oqýshylary tegin tamaqpen qamtamasyz etilgen. Sol siiaqty atalǵan sanatqa jatatyn otbasynyń balalaryna jazǵy ýaqytta demalys uiymdastyrylady. Atap aitqanda, osy jazda elordanyń 10 myń búldirshinine jazǵy demalys oryndaryna joldama beriledi, bul maqsatta 500 mln teńge qarjy bólý qarastyrylýda», - dedi ol.
Sondai-aq, B.Sultanov az qamtylǵan jáne kóp balaly otbasydan shyqqan oqýshylardy mektep formasymen qamtamasyz etý maqsatynda biýdjetten 638 mln teńge jáne osy sanatqa jatatyn otbasydan shyqqan búldirshinderdi balabaqshamen qamtý maqsatynda 513 mln teńge qarjy bólinetinin aityp ótti.
