Elimizdiń ońtústik óńirlerinde aǵyn sý tapshylyǵy bolady degen boljam bar. Bul týraly búgin Túrkistan oblysyna jumys saparymen kelgen QR ekologiia, geologiia jáne tabiǵi resýrstar vitse-ministri Serik Qojaniiazov atap ótti, dep habarlaidy QazAqparat.
Maqtaaral jáne Jetisai aýdandaryndaǵy sý nysandarynyń jai-kúiimen tanysqan vitse-ministr kórshiles eldegi Toqtaǵul qoimasynda sýdyń qory josparlaǵannan 1,6 mlrd tekshe metrge kem jinalǵanyn jetkizdi.
Elimizge keledi dep boljanǵan 10,3 mlrd tekshe metr sýdyń ornyna biyl 7,3 mldr tekshe metr sý jetkizilýi múmkin ekenin aityp ótti.
Saldarynan Shardara men Kóksarai sý qoimalaryndaǵy sýdyń kólemi byltyrǵyǵa qaraǵanda 1 mlrd tekshe metrge az jinalyp, Kóksarai sý qoimasynda sýdyń mólsheri tym tómen bolady degen boljam bar.
Osy qiyndyqtan shyǵý joldaryn talqylaý kezinde Serik Qojaniiazov diqandarǵa kóktemgi jaýyn shashyn az bolsa aǵyn sýdy az qajet etetin daqyldarǵa kóshý kerektigin eskertti.
«Biyl osy Kóksaraisyz shyǵatyn amaldar tabýymyz kerek. Mindetti túrde qosymsha shara, oǵan jyldaǵy nasosymyz bar, kezekke turatynymyz bar. Sýdy kóp talap etetin daqyldardy egýdi azaitý máselesi bar degendei. Eki aýdannyń tórt myńdai gektar jerinde kúrish egiledi. Biyl osy kúrishti meilinshe ekpeý kerek. Óitkený maqta siiaqty basqa daqyldarǵa sý jetpeidi. Sosyn taǵy bir qiyndyq Kóksaraidyń mańynda 2,5 myń gektar jerge Arys aýdanynyń sharýalary daqyl egedi. Olarǵa biyl egin egýge jaǵdai bolmaidy. Sol sebepti sondai qiynshylyqtar bolady. Degenmen jaǵdai Úkimettiń jiti baqylaýyna alynyp, kórshiles eldermen kelissózder júrgiziledi», - dedi Serik Qojaniiazov.
Tyǵyryqtan shyǵýdyń joldaryn qarastyrǵan mamandar Kóksaraida sý bolmasa bir ǵana Shardaranyń sýy Túrkistan men Qyzylorda oblystaryna jetpeidi dep otyr.
Sondyqtan aǵyn sý máselesi boiynsha óńirdegi jaǵdaidy zerdelep, sý tapshylyǵyna bailanysty qolǵa alynatyn jumystardy pysyqtap ótti.
Vitse-ministr aǵyn sý jetkizý aldymyzdaǵy aqpan jáne naýryz ailary qarly ári jańbyrly bolsa, jaǵdai rettelýi múmkin ekenin de atap ótti.
«Degenmen biz biyl meilinshe sýdy az qajet etetin kókónister men daqyldardy egip, sýdy paidalaný tártibin retteýimiz qajet. Issaparymyzda oblys, aýdan, qala ákimdikterimen osy másele boiynsha keńesip, tyǵyryqtan shyǵatyn joldardy qarastyrdyq. Tiisti nusqaýlar berildi. Syrdariia ózeniniń sýy boiynsha úkimetaralyq deńgeide qaralatyn da máseleler bar», – dedi Serik Qojaniiazov.
Aita keteiik, Túrkistan oblysynda 44 sý qoimasy, 105 magistraldi kanal, 1699 sharýashylyqaralyq jáne sharýashylyqishilik arna, 1200-dei tik drenajdy uńǵyma bar.
Qazirgi tańda ministrlik pen oblys ákimdigi tarapynan óńirde sý únemdeý tehnologiialaryn qoldaný jáne ony jappai engizý boiynsha uiymdastyrý, túsindirme jumystary júrgizilip jatyr.
