Jyl basynan beri memlekettik biýdjetke 4 trln 355 mlrd teńge qarajat tústi. Bul týraly QR Qarjy ministri Erulan Jamaýbaev aityp berdi, dep habarlaidy "Ult aqparat".
«Biylǵy 5 aidyń qorytyndysy boiynsha memlekettik biýdjetke 4 trln 355 mlrd teńge somasynda qarajat tústi nemese jospar 110,4%-ke atqaryldy. Respýblikalyq biýdjetke 2,7 trln teńge somasynda kirister tústi nemese jospar 101,6%-ke atqaryldy», - dedi Qarjy ministri búgingi Úkimet otyrysynda.
Onyń aitýynsha, kirister boiynsha jospar 42 mlrd teńgege, onyń ishinde salyqtar boiynsha – 2 mlrd teńgege, salyqtyq emes túsimder boiynsha 39 mlrd teńgege asyra oryndalǵan.
«Bul negizinen importqa salynatyn qosylǵan qun salyǵy, munaiǵa eksporttyq keden bajy jáne korporativtik tabys salyǵy esebinen qamtamasyz etildi. Importqa salynatyn QQS boiynsha jospardyń asyra oryndalýy: ótken jyldyń uqsas kezeńimen salystyrǵanda biylǵy 4 aida úshinshi eldermen import kóleminiń 8,1%-ke nemese 488 mln dollarǵa ulǵaiýyna bailanysty. Oǵan qosa 2021 jylǵy 1 toqsanda Eýraziialyq ekonomikalyq odaqqa múshe memleketterden importtyq jetkizilimder kóleminiń 11,8%-ke ulǵaiýy áser etti. Shiki munaiǵa eksporttyq kedendik baj boiynsha asyra oryndaý eksporttyq keden bajy mólsherlemesiniń ulǵaiýyna bailanysty boldy», - dep túsindirdi Qarjy ministri.
