Biyl ekonomikalyq ósim 3 paiyz deńgeiinde qamtamasyz etiledi. Bul týraly Májilistegi «Nur Otan» partiiasy parlamenttik fraktsiiasynyń keńeitilgen otyrysynda Úkimet basshysy Asqar Mamin aitty, dep habarlaidy QazAqparat.
«Sapaly ári turaqty ekonomikalyq ósim teńgerimdi makroekonomikalyq saiasat, ekonomikany odan ári ártaraptandyrý, investitsiiany targettep tartý jáne eksportty proaktivti ilgeriletý esebinen qamtamasyz etiledi. Biýdjet shyǵystary ońtailandyrylyp, Ulttyqqordan qosymsha transfertter shekteledi. Ekonomikany ártaraptandyrýdyń jańa tetikterin júzege asyrý jáne biýdjetti tolyqtyrý nátijesinde 2025 jylǵa biýdjettiń munaidan emes tapshylyǵy 6 paiyzǵa, al jalpy tapshylyq 3 paiyzǵa deiin bolady», - dedi Úkimet basshysy «Nur Otan» partiiasynyń «Ózgerister joly: ár azamatqa laiyqty ómir!» Sailaý baǵdarlamasyn oryndaýdyń Jol kartasyn talqylaý barysynda.
Onyń atap ótýinshe, 2020 jyly infliatsiia deńgeii 6,1 paiyzdan 2025 jylǵa qarai 3-4 paiyzǵa deiin kezeń kezeńimen tómendeidi.
«2025 jylǵa qarai ekonomikanyń jyl saiynǵy ósim qarqyny 5 paiyzdan asady. Biyl ekonomikalyq ósim 3 paiyz deńgeiinde qamtamasyz etiledi. Investitsiia tartý jónindegi jańa sharalardy júzege asyrýdyń nátijesinde jalpy tikelei shetel investitsiianyń jyldyq kólemi 2021 jyly 15,9 mlrd dollardan 2025 jylǵa deiin 30 mlrd dollarǵa artady. Bul rette Negizgi kapitalǵa salynǵan investitsiia deńgeii 2025 jylǵa qarai JIÓ-niń 30 paiyzyna deiin jetkiziledi», - dedi Asqar Mamin.
