Foto: Úkimet
Úkimet Memleket basshysynyń tapsyrmasy boiynsha sharýalardy qarjylandyrý tetigin qaita qarady. Osy jyldan bastap fermerlerge jeńildetilgen nesieler burynǵydai naýqan bastalǵan kezde naýryz aiynda emes, aldyn ala 2024 jyldyń jeltoqsanynan bastap qoljetimdi boldy. Bul sheshim qajetti resýrstardy aldyn ala satyp alýǵa múmkindik berý maqsatynda qabyldandy, dep habarlaidy Ult.kz.
Memlekettik qoldaý sharalarynyń, diqandar men jergilikti atqarýshy organdardyń úilesimdi jumysynyń arqasynda egis jumystary agrotehnikalyq talaptarǵa sai ári ýaqtyly júrgizilip, naýqan alǵash ret belgilengen merziminde aiaqtaldy. Mundai tásil negizgi dala jumystaryn merziminen buryn oryndaýǵa, strategiialyq mańyzdy daqyldardyń egis kólemin arttyrýǵa jáne materialdyq-tehnikalyq bazany tiimdi jańartýǵa múmkindik berdi. Sonyń nátijesinde mol ónim alýǵa jáne aýyl sharýashylyǵynyń turaqty damýyna berik negiz qalandy.
2025 jylǵy egis naýqany elimizde eginshilikke degen jańa kózqaras jaǵdaiynda ótti. Onyń basty erekshelikteriniń biri – aýyl sharýashylyǵy óndirisin ártaraptandyrýǵa jáne monodaqyldarǵa táýeldilikti azaitýǵa basymdyq berilýi. 6 maýsymdaǵy jaǵdai boiynsha josparlanǵan kólemniń 100%-y – 23,7 mln gektar alqap egildi.
Egis alqaptaryn neǵurlym tiimdi ári turaqty daqyldarǵa qaita bólýge erekshe nazar aýdaryldy. Bul aýyl sharýashylyǵyn klimattyq ózgeristerge beiimdeýge ǵana emes, sonymen qatar ǵylymi negizdelgen aýyspaly egis talaptaryn saqtai otyryp, naryqtyq úrdisterdi eskerýge múmkindik berdi.
Nátijesinde suranysqa ie daqyldardyń kólemi artty:
▪️maily daqyldar – 3,4 mln gektar (byltyrǵydan 0,5 mln gektarǵa artyq),
▪️mal azyǵy daqyldary – 3,3 mln gektar (+114 myń gektar),
▪️dándik júgeri – 167,5 myń gektar,
▪️kókónis-baqsha daqyldary – 222,3 myń gektar.
Áleýmettik mańyzy bar daqyldar kólemi de artýda: kartop alqaby 83,4 myń gektarǵa jetip, ótken maýsymmen salystyrǵanda 11,3 myń gektarǵa kóbeidi.
Sonymen qatar resýrsty kóp qajet etetin ári baǵa ózgerisine beiim daqyldardyń – bidai, kúrish, maqta – egis kólemi qysqarýda. Mysaly, bidai alqaby 13 mln gektardy qurady, bul ótken jylǵydan 187 myń gektarǵa kem.
Osylaisha, egisti ártaraptandyrý strategiiasy elimizdiń azyq-túlik qaýipsizdigin nyǵaitýǵa jáne agroónerkásip kesheniniń eksporttyq áleýetin damytýǵa serpin berýde.
Tuqym qoryna kelsek, 2025 jylǵy egis naýqanyna respýblika boiynsha 2,3 mln tonna tuqym daiyndaldy. Bul diqandardyń dala jumystaryna esh kidirissiz, qajetti resýrstar tapshylyǵynsyz ýaqytynda shyǵýyna múmkindik berdi.
