Biyl taýly aimaqtarda tasqyn qaýpi uzaq saqtalýy múmkin. Ekologiia, geologiia jáne tabiǵi resýrstar vitse-ministri Serik Qojaniiazov «Qazgidromet» málimetterine súiene otyryp osyndai boljam aitty, dep habarlaidy QazAqparat.
«Qazgidromettiń» málimeti boiynsha, Qyzylorda, Atyraý, Mańǵystaý oblystarynda qar tolyǵymen erip ketti. Sondai-aq, Túrkistan, Jambyl, Almaty oblystarynyń jazyq jerlerinde túgeldei eridi. Alaida, jazyq óńirlerde tasqyn qaýpi tek kóktemde týyndasa, Shyǵys Qazaqstan, Almaty, Jambyl, Túrkistan oblystarynyń taýly bólikterinde tasqyn qaýpi qar erigen kezde jáne qatty jaýyn bolǵan kezde kúsheiedi», - dedi vitse-ministr.
Onyń sózine qaraǵanda, biyl kóktemniń alǵashqy kúnderi sýyq boýyna bailanysty Qaraǵandy, Aqmola, SQO, Qostanai, BQO, Aqtóbe óńirlerinde qar áli erip bitpegen.
«Bir sózben aitqanda, «Qazgidromettiń» málimet boiynsha biyl 2015, 2017 jyldardaǵydai tasqyn qaýpi joq. Biraq temperatýranyń kúrt artyp, jaýyn-shashynnyń jiileýi Qaraǵandy, Aqmola, Soltústik Qazaqstan, Qostanai, Almaty, Túrkistan, Jambyl jáne Shyǵys Qazaqstan oblystarynda ishinara sý basý kórinisteri bolýy múmkin», - dedi Serik Qojaniiazov.
