Nur-Sultan ákimi Altai Kólginov problemaly dep tanylǵan «Femida» jáne «Bereket» turǵyn úi keshenderiniń qurylys barysymen tanysty, dep habarlaidy "Ult aqparat".
«Problemaly dep tanylǵan úilerge baryp, atqarylyp jatqan jumystardy baqylaý – qurylystyń naqty qandai qarqynmen júrip jatqanyn kórýge múmkindik beredi. Qurylysy uzaqqa sozylǵan úilerde jaǵdai ártúrli: bir jerde tek qazanshuńqyr ǵana bolsa, endi birinde úidiń qańqasy ǵana boldy. Kei ǵimarattarda bólshekteý jumystaryn júrgizý nemese úi syzbasyna ózgerister engizý qajet boldy. Sebebi, kei úilerde 5 qabattyń ornyna 9 qabat salynyp, úleskerlerge satylyp ketken.
Búgin «Femida» (Abat) jáne «Bereket» turǵyn úileriniń qurylys jumystarynyń barysymen tanystym. Buǵan deiin atalǵan úilerdiń úleskerleri birqatar mańyzdy máselelerdi kótergen bolatyn. Olardyń basym bóligi sheshildi. Injenerlik jelilerdi qosamyz. Úilerdi jylytý maýsymyna daiyndaý qajet. Úi qurylysy biyl aiaqtalady dep josparlap otyrmyz», - dep jazdy A.Kólginov Instagram-daǵy paraqshasynda.
Qala ákimi atap ótkendei, qurylysshylarǵa qoiylatyn basty talap-qurylys jumystaryn sapaly oryndaý. Sondai-aq úi aýmaqtaryn abattandyrýmen ainalysý qajet.
