Memleket basshysy Astana qalasynyń ákimi Jeńis Qasymbekti qabyldady, dep habarlaidy Aqordanyń baspasóz qyzmeti.
Qasym-Jomart Toqaevqa elordanyń áleýmettik-ekonomikalyq jáne infraqurylymdyq damýy jóninde málimet berildi.
Astana qalasynyń ákimi barlyq negizgi ekonomikalyq kórsetkishter boiynsha oń dinamika baiqalatynyn aitty.
Byltyr tartylǵan investitsiia kólemi 1,6 trillion teńgeni qurady. Óńdeý ónerkásibi, bilim, meditsina, logistika, kólik jáne basqa da salalarda iske asyrylǵan jobalardyń nátijesinde 1,8 myń jumys orny ashyldy.
Ótken jyly JOLTAP jobasy aiasynda 6 myńǵa jýyq azamat jumysqa ornalasty. Al biyl jumyspen qamtylatyn azamattardyń sanyn 2 ese ulǵaitý, iaǵni 12 myń adamnan asyrý josparlanyp otyr. Jalpy 2024 jyly 58 myńǵa jýyq jumys ornyn ashý kózdelgen.
Sonymen qatar Prezidentke jylytý maýsymynyń barysy týraly da baiandaldy. Byltyr kúzde «Ońtústik-Shyǵys» gaz jylý stantsiiasyn, «Turan» gaz jylý stantsiiasynyń birinshi kezegin jáne úshinshi JEO-ny iske qosý nátijesinde jylý qala boiynsha uzaq ýaqyttan beri alǵash ret artyǵymen berilip jatyr. Elordanyń tynys-tirshiligin qamtamasyz etetin bul nysandardyń qýaty – saǵatyna 1140 gigakaloriia.
Memleket basshysyna biyl «Telman» gaz jylý stantsiiasynyń birinshi kezegi jáne «Turan» gaz jylý stantsiiasynyń ekinshi kezegi, úshinshi JEO-nyń kómirmen jylytylatyn bóliginiń iske qosylatyny týraly málimet berildi. Bul nysandar qalany qosymsha 600 Gkal/saǵat jylý qýatymen qamtamasyz etedi.
Budan bólek, Jeńis Qasymbek áleýmettik nysandardyń (mektepter, oqýshylar sarailary, balabaqshalar, meditsinalyq ortalyqtar, jeńildikpen beriletin turǵyn úiler) qurylysy, apatty jaǵdaidaǵy eski úilerdi súrý, qurylysy uzaqqa sozylǵan nysandardy salyp bitirý, turǵyn úi alaptaryn damytý, qalany abattandyrý jáne kógaldandyrý jumystary týraly aitty.
Prezident Qasym-Jomart Toqaev elordany odan ári damytý jóninde birqatar tapsyrma berdi.
