Almaty ákimi Baqytjan Saǵyntaev tikelei efir barysynda pandemiianyń barlyq qiyndyqtaryna qaramastan, megapolis óz áleýetin arttyrýdy jalǵastyryp, qalpyna keltirýdiń joǵary qarqynyn kórsetip otyrǵanyn aitty, dep habarlaidy QazAqparat.
Qala ákiminiń aitýynsha, biyl qańtar-qarasha ailarynda qysqa merzimdi ekonomikalyq indikator 108,7%-dy qurady.
Ónerkásipte 20,1%-ǵa, qurylysta – 20%-ǵa, bailanys qyzmetterinde – 13,8%-ǵa, saýdada – 5,1%-ǵa ósý qamtamasyz etildi.
Investitsiia tartýda joǵary dinamika baiqalady.
Negizgi kapitalǵa salynǵan investitsiia kólemi 17,5% ósimmen 1 014,4 mlrd teńgeni (QR-daǵy úlesi – 9%) qurady.
Sondai-aq biýdjet kiristeri ósiminiń joǵary qarqyny qamtamasyz etildi.
2021 jyldyń 11 aiynyń qorytyndysy boiynsha memlekettik biýdjetke salyqtar men tólemderdiń 28,7% ósimimen.2 trln 558,7 mlrd teńge tústi.
Ekonomikany qalpyna keltirý memlekettik baǵdarlamalardy belsendi iske asyrý jáne nesieleýdi keńeitýmen qatar júrdi.
Atap aitqanda, qala ákimi atap ótkendei, Almaty Finance jáne «Almaty MQU» jelisi boiynsha jalpy somasy 513 mln teńgege 9 joba qarjylandyryldy.
«Biznestiń jol kartasy – 2025» memlekettik baǵdarlamasy aiasynda granttar beriledi, al belsendiligi tómen aýdandarda ShOB yntalandyrý úshin 5%-ben nesie beriledi.
Jalpy, shaǵyn biznesti nesieleý ótken jyldyń osy kezeńimen salystyrǵanda 1,4 ese artyp, 1 trln 835,9 mlrd teńgeni qurady.
Sondai-aq, ShOB úshin «Qarapaiym zattar ekonomikasy» jáne «Biznestiń jol kartasy» baǵdarlamalary jumys isteidi.
Olar óz tiimdiligin dáleldedi, sondyqtan olardy júzege asyrý kelesi jyly da jalǵasady.
Almatyda jyl basynan beri der kezinde qabyldanǵan sharalardyń arqasynda 55 myńnan astam jumys orny turaqty jumyspen 35 935 adam, ýaqytsha jumyspen – 19 106 adam qamtamasyz etildi) quryldy.
Nátijesinde jumyssyzdyq búginde 5,1%-dy quraidy.
Budan basqa, Indýstrialdy aimaqta 79,7 mlrd teńge somasyna 17 joba iske asyryldy, 154,9 mlrd teńgege ónim óndirildi, 2,6 myńnan astam jumys orny quryldy.
Jyl sońyna deiin Indýstrialdy aimaqta 519 jumys orny qurylatyn 4 jańa jobany (38,6 mlrd) iske qosý josparlanýda. Olardyń qatarynda sheteldiń qatysýymen PTR-testileriniń óndirisi boiynsha («Kaz-dia-test» JShS) mańyzdy joba bar.
