QR Energetika ministri Bolat Aqsholaqov munai-gaz himiiasy salasyndaǵy importty almastyrý jobalarynyń jaǵdaiy týraly málimet berdi, dep habarlaidy QazAqparat.
«Aǵymdaǵy jyly qýattylyǵy jylyna 500 myń tonna bolatyn polipropilen óndirý zaýytyn paidalanýǵa berý josparlanǵan. Sondai-aq, qýaty jylyna shamamen 1 mln tonna tereftal qyshqyly men polietilentereftalat, qýaty jylyna 1,25 mln tonna polietilen zaýytyn jáne qýaty jylyna 189 myń tonna býtadien óndirý jónindegi jobalaryn iske asyrýǵa nazar aýdarylady», - dedi ol Úkimet otyrysynda.
Aitýynsha, osy jobalardy iske asyrý Qazaqstan ekonomikasyna shamamen 10 mlrd dollar investitsiia tartýǵa múmkindik beredi.
«Aǵymdaǵy jyly «Teńizshevroil», «Qarashyǵanaq Petroliým Opereiting» jáne «Nort Kaspian Opereiting Kompani» konsortsiýmdarymen munai-gaz mashinasyn jasaýdy damytýdyń halyqaralyq ortalyǵy quryldy.
Osy 3 kásiporynnyń taýarlaryn óndirýdi jergiliktendirý arqyly jumys istep turǵan otandyq taýar óndirýshilerdiń múmkindikterin keńeitý kózdelgen. Bul kásiporyndardyń jyl saiynǵy satyp alý kólemi shamamen 5 trln teńgeni quraidy», -dedi Bolat Aqsholaqov.
Ministrdi jergilikti qamtýdy damytýdyń tikelei investitsiialar qory qurylǵanyn eske saldy.
«Shevron» kompaniiasy Qazaqstan aldyndaǵy qaita investitsiialaý mindettemeleri sheńberinde jergilikti qamtýdy damytýǵa 248,5 mln AQSh dollaryn bólýde.
Investitsiialar negizinen tehnologiia men IT, bazalyq taýarlar óndirisi jáne munai-gaz sektoryna arnalǵan jabdyqtardyń jekelegen túrlerin qurastyrý jáne qorshaǵan ortany qorǵaý siiaqty úsh baǵytqa salynady. Qor «Astana» halyqaralyq qarjy ortalyǵynyń alańynda tirkelgen.
Osyndai bastamalardyń arqasynda biz munai-gaz salasy úshin taýarlar óndirýge baǵyttalǵan óz júiemizdi qalyptastyrýymyz kerek», - dedi Energetika ministri.
