Biyl 480 aýyldyń damýyna 105 mlrd teńge jumsalady. Bul týraly Úkimet otyrysynda QR Ulttyq ekonomika ministri Áset Erǵaliev aitty, dep habarlaidy "Ult aqparat".
Jalpy 6 316 aýyldyń ishinen damý áleýeti bar 3,5 myń aýyl irikteldi. Onda aýyl turǵyndarynyń 88 paiyzy turady. Atalǵan aýyldar demografiialyq kórsetkishterge, ekonomikalyq belsendilikke, infraqurylymnyń jai-kúiine qarai irikteldi. Bul aýyldardy damytý «Aýyl-El besigi» jobasy aiasynda birinshi kezekte júzege asyrylatyn bolady», - dedi ol.
Ministrdiń aitýynsha, aýyl turǵyndarynyń ómir súrý deńgeiin arttyrý úshin 2019 jyly infraqurylymdar men áleýmettik igilikterge qol jetimdiligi jóninde jańa óńirlik standarttar ázirlenip, bekitildi.
«Aýyldyq eldi mekenderdiń nysandarmen qamtamasyz etilýi 2020 jyly respýblika boiynsha 60,3 paiyzdy qurady. Eń joǵary kórsetkishter Pavlodar, Mańǵystaý, Soltústik Qazaqstan oblystarynda baiqalady. Biyl «Aýyl – El besigi» jobasy aiasynda 1,3 mln adam turatyn 480 aýyldyń damýyna 105 mlrd teńge baǵyttaý josparlanýda. Bul óz kezeginde kólik jáne áleýmettik infraqurylym, sonymen qatar turǵyn-úi kommýnaldyq sharýashylyǵyn damytýǵa arnalǵan 1 myńnan astam jobany iske asyrýǵa múmkindik beredi», - dedi Áset Erǵaliev.
