Bastapqy jarna mólsherin ózgertý jáne kópbalaly otbasylar, jetim balalar men erekshe qajettilikteri bar azamattarǵa jeńildetilgen ipoteka berý. Osy jáne ózge de ózekti máseleler «Nur Otan» partiiasy janyndaǵy Jumyspen qamtýdy jáne halyqtyń áleýmettik osal toptaryn qoldaý jónindegi jańa respýblikalyq qoǵamdyq keńestiń birinshi uiymdastyrýshylyq otyrysynda talqylandy, dep habarlaidy "Ult aqparat" partiianyń baspasóz qyzmetine silteme jasap.
Partiianyń baspasóz qyzmeti taratqan aqparatqa sáikes, «Nur Otan»-nyń sailaýaldy baǵdarlamasyn iske asyrý jónindegi jol kartasy aiasynda biyl elimizde 17 mln sharshy metr turǵyn úi salý josparlansa, onyń 2,5 milliony halyqtyń áleýmettik osal toptaryna arnalǵan. 2021 jyldyń tórt aiynda 3,5 mln sharshy metr turǵyn úi nemese 28,9 myń páter paidalanýǵa berildi.
Alaida, baspanaǵa muqtaj adamdar sany kún saiyn ósýde. Búginde turǵyn úi kezeginde 562 myń otbasy tur, onyń 185 myńynyń tabysy otbasynyń bir múshesine shaqqanda eń tómengi kúnkóris deńgeiinen tómen.
Indýstriia jáne infraqurylymdyq damý birinshi vitse-ministri Qaiyrbek Óskenbaevtyń aitýynsha, olardy turǵyn úimen jedel qamtamasyz etý úshin jeke turǵyn úi qoryndaǵy jaldaý aqysynyń bir bóligin Nur-Sultan jáne Almaty qalalary úshin 31 AEK, ózge óńirler úshin 21 AEK jáne aýyldyq jerler úshin 15 AEK mólsherinde sýbsidiialaý usynylady.
Sonymen qatar, vitse-ministr az qamtylǵan otbasylarǵa arnalǵan baspana qurylysyna jańa kózqaras týraly aityp berdi.
«Áleýmettik osal otbasylar úshin turǵyn úidi paidalanýǵa berý kólemi jylyna shamamen 10 myń páterdi quraidy, mundai jaǵdaida problema tek 20 jylǵa jýyq ýaqyttan keiin ǵana sheshiledi. Sondyqtan qarajatty ákimdikter salatyn úilerdiń qurylysyna emes, jeke investitsiialardy tartý úshin kommertsiialyq kompaniialardy sýbsidiialaýǵa baǵyttady. Jyl saiyn 37 myń páter tapsyramyz jáne 5 jyl ishinde barlyq az qamtylǵan otbasylardy turǵyn úimen qamtamasyz etýge tyrysamyz», - dedi Qaiyrbek Óskenbaev.
Taǵy bir mańyzdy másele – erekshe qajettilikteri bar adamdarǵa baspana berý. Bul baǵyttaǵy pármendi tetikterdiń biri ipotekalyq nesie berý bolyp tabylady.
«Otbasy banki» basqarma tóraiymy Lázzat Ibragimovanyń aitýynsha, 2 myńǵa jýyq múgedektigi bar tulǵalar men múgedek balalardy tárbielep otyrǵan otbasylardyń bankte 19,6 mlrd teńge somasynda nesieleri bar. Mundai otbasylardyń jalpy somasy 3,7 mlrd teńgeni quraityn 10 myńǵa jýyq depoziti bar.
«Baqytty otbasy» baǵdarlamasy aiasynda múgedek balalardy tárbielep otyrǵan otbasylarǵa 13,8 mlrd teńge somasynda 1,3 myń zaim berildi. Biyl osy baǵdarlama boiynsha halyqtyń áleýmettik osal toptary 27 myńnan astam ótinish joldady. Jartysynan kóbi «tolyq emes otbasy» sanatyna jatady», - dedi Lázzat Ibragimova.
Óz kezeginde Keńes múshesi Irina Smirnova sońǵy jyldary kezekte turǵandardyń sany artyp, beriletin páterler sany azaiyp bara jatqanyn atap ótti.
«Kezekte turǵandardy turǵyn úimen qamtamasyz etý baiaý júrip jatyr, sondyqtan jyl ótken saiyn kezek kóbeimese azaimai tur. Mysaly, ótken jyly kezek 23%-ǵa ulǵaisa, al turǵyn úi alǵandar sany 3%-ǵa azaidy. Mundai qarqynmen, kezektiń sońynda turǵandar 80 jyldan keiin ǵana baspana alady. Sondyqtan múgedektigi bar adamdar úshin turǵyn úi qoryn ulǵaitý qajet», - dedi Irina Smirnova.
Eske sala keteiik, «Nur Otan» partiiasynyń sailaýaldy baǵdarlamasy aiasynda 2025 jylǵa qarai 1 mln otbasy úshin 103 mln sharshy metr turǵyn úi berý mindeti tur. Onyń ishinde 284 myń kópbalaly jáne kedeilik shegindegi otbasylar, sondai-aq múmkindigi shekteýli azamattar men jetim balalar bar.
Otyrys qorytyndysy boiynsha «Nur Otan» partiiasy atynan keńes músheleri «Turǵyn úi qatynastary týraly» zańǵa birqatar ózgerister men tolyqtyrýlar engizýdi usyndy.
Sonymen, olardyń pikirinshe, múgedek bala 18 jasqa tolǵan kezde onyń turǵyn úi alý kezeginiń saqtalýyn, áleýmettik osal sanattar úshin turǵyn úi qurylysynyń kólemin ulǵaitýdy, «Nurly jer» memlekettik baǵdarlamasynda kózdelgen eń tómengi kúnkóris deńgeiiniń shegin kóterýdi eskergen jón. Budan basqa, áleýmettik osal otbasylarǵa satyp alý quqyǵynsyz buryn jalǵa berilgen turǵyn úidi olardyń jekeshelendirip alýyna múmkindik berilýi kerek.
