Biyl 2,2 myń shaqyrym respýblikalyq jolda jóndeý jumystary aiaqtalady. Bul týraly QR Indýstriia jáne infraqurylymdyq damý vitse-ministri Berik Kamaliev aitty, dep habarlaidy QazAqparat.
«Biyl jol-qurylys jumystarymen 8,4 myń shaqyrym qamtylǵan. Respýblikalyq jeli boiynsha 5 myń shaqyrym, onyń 3,6 myń shaqyrymy rekonstrýktsiiamen, 1,5 myń shaqyrymy jóndeý jumystarymen qamtylǵan. Jergilikti jeliniń joldary men kóshelerinde jol-qurylys jumystary 3,4 myń shaqyrym jolda júrgizilýde. Jyl qorytyndysy boiynsha biz respýblikalyq avtomobil joldarynyń 90 jáne oblystyq jáne aýdandyq mańyzy bar joldardyń 80 paiyzyn normativtik jaǵdaiǵa jetkizýdi kózdeimiz», - dedi Berik Kamaliev Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, búgingi tańda rekonstrýktsiia jumystarymen uzyndyǵy 955 shaqyrym bolatyn Qaraǵandy-Balqash-Burylbaital-Qurty-Qapshaǵai ýchaskesi qamtylǵan. Elimizdiń shyǵysynda 768 shaqyrymdyq Taldyqorǵan-Óskemen jáne 415 shaqyrymdyq Qalbataý-Maiqapshaǵai avtomobil joldary qaita jańartylýda.
«Budan bólek, Úsharal-Dostyq, Merke-Burylbaital, sondai-aq, Uzynaǵash-Otar avtomobil joldarynyń rekonstýktsiiasyn júrgizýdemiz. Batys óńirde Aqtóbe-Atyraý-Astrahan dálizin jańartý boiynsha jumystar qarqyndy júrgizilip jatyrmyz. Sondai-aq, Shamalǵan stantsiiasynyń temirjol ótkelinde jol airyǵynyń qurylysy jalǵasýda. Jalpy jyl qorytyndysy boiynsha respýblikalyq mańyzy bar joldardyń 2,2 myń shaqyrymynda jumystardy aiaqtaý josparlanǵan», - dedi ol.
Vitse ministrdiń aitýynsha, memlekettik-jekeshelik seriktestik aiasynda Úlken Almaty ainalma avtomobil jolynyń qurylysy júrgizilip jatyr. Qurylys jumystary 2024 jyly aiaqtalady.
«Sonymen qatar, Almaty qalasynan ÚAAAJ-ǵa deiin jalpy uzyndyǵy 70 shaqyrym bolatyn 6 shyǵys jolyn salý jáne rekonstrýktsiialaý júrgizilýde», - dedi vitse-ministr.
