QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda Ulttyq biryńǵai testileýdi jańa jaǵdaida ótkizýge daiyndyq máselesi qaraldy. Daiyndyq jumystary týraly bilim jáne ǵylym ministri Ashat Aimaǵambetov baiandady, dep habarlaidy "Ult aqparat".
Ulttyq biryńǵai testileý biyl 17 ret ótkiziledi. Osy kezeń aralyǵynda testileýge 2 mln-ǵa jýyq adam qatysqan.
A. Aimaǵambetov atap ótkendei, 2019 jyldan bastap UBT jylyna 4 ret ótkiziledi (qańtar, naýryz, maýsym, tamyz ailarynda). UBT formaty ózgertilgen joq, 5 pán boiynsha qaǵaz túrinde: 3 mindetti jáne 2 beiindik pán boiynsha ótedi. Barlyq test tapsyrmasynyń sany – 120, maksimaldy ball – 140.
«2020 jylǵy 15 sáýirden 13 mamyrǵa deiin UBT-ǵa qatysý úshin ótinishter qabyldandy. Osy jyly ótinishter onlain formatta, sondai-aq, ótinishterdi qabyldaý pýnktterinde qabyldaý jolymen qabyldandy (interneti joq nemese álsiz jyldamdyqtaǵy interneti bar qashyqta ornalasqan aýyldyq óńirler úshin). Osy jyly UBT-ǵa qatysý úshin 111 myń adam ótinish bildirdi, ótken jylmen salystyrǵanda 11%-ǵa joǵary», — dedi bilim jáne ǵylym ministri.
UBT-ǵa qatysý úshin barlyǵy 131 755 ótinish tirkeldi, onyń ishinde 110 678 ótinish onlain formatta jáne 21 077 ótinish qabyldaý pýnktterinde qabyldandy.
«UBT bekitilgen merzimde 20 maýsymnan 5 shildege deiin sanitarlyq-epidemiologiialyq talaptardy qatal túrde saqtaý arqyly 161 UBT ótkizý pýnktteriniń bazasynda ótkiziledi», — dedi A. Aimaǵambetov.
Biyl UBT tapsyrý erejesine engiziletin jańashyldyqtar:
- UBT-ǵa qatysý úshin qujattardy onlain tapsyrý jáne kirý kezinde bet-álpetin taný kómegimen (Face ID) tulǵany sáikestendirý;
- UBT elektrondyq sertifikatyn jáne bilim berý grantyn taǵaiyndaý týraly elektrondyq kýálikti engizý;
- SAT, ACT jáne IB halyqaralyq standarttalǵan testteriniń baldaryn UBT balyna aýdarý shkalasyn engizý. Kórsetilgen sertifikattarǵa ie tulǵalar UBT tapsyrýdan bosatylady jáne bilim berý grantyn taǵaiyndaý konkýrsyna qatysa alady;
- akademiialyq kezeń aiaqtalǵanǵa deiin qabyldanǵan, UBT shektik balyn jinamaǵan túlekter jyl ishinde UBT tapsyrý múmkindigine ie;
- pedagogikalyq daiarlaý baǵytyna túsýshiler úshin UBT shektik balyn 70 balǵa kóterý;
- UBT ótkizý beinejazbasynyń saraptamasyn ótkizý jáne oqýǵa túsýshilerdiń tyiym salynǵan zattardy qoldanǵany anyqtalǵan jaǵdaida UBT nátijesin, sondai-aq, bilim berý grantyn joiý;
Sondai-aq túlekterge test tapsyrý oryndarynda kalkýliatorlar beriletin bolady jáne testileý ýaqyty 3 saǵat 50 minýttan 4 saǵatqa ózgertiletin bolady.
Buǵan qosa ata-analarǵa jáne basqa alyp júrýshi tulǵalarǵa balalardy UBT ótkizý pýnktterinde kútýge tyiym salynady.
«Ata-analarǵa UBT ótkizý barysyn qaraý úshin onlain taratylym jasalady. UBT ótkizý pýnktteri barrikadalyq lentalarmen qorshalady. UBT ótkizý pýnktterine kirý tártibi testilenýshilerdiń arasynda 2 metr qashyqtyq saqtalýyn qamtamasyz etedi. Bul qashyqtyq UBT tapsyrý kezinde de saqtalady. Ǵimaratqa kirý esikteri jáne UBT ótkizý protsesi videobaqylaý júiesimen qamtamasyz etiledi», — dedi bilim jáne ǵylym ministri.
161 UBT ótkizý pýnktterinde 50% toltyrýmen 1200 asa aýditoriia iske qosylady. Koronavirýs infektsiiasynyń taralý qaýipin azaitýǵa arnalǵan zararsyzdandyrýdyń 5 sharasy qoldanylady:
-
test tapsyrýshylardy zararsyzdandyrý tonnelderinen ótkizý;
-
aiaq-kiimderdi arnaiy zararsyzdandyrý kilemshelerimen óńdeý;
-
qoldy sanitaizermen tazalaý;
-
dene qyzýyn ólsheý;
-
bir rettik maskalardy berý.
UBT ótkizý kezinde test tapsyrýshyǵa uialy bailanys quraldaryn jáne basqa da radioelektrondyq bailanys quraldaryn kirgizýge tyiym salynady.
«Testileý materialdary 100% basyp shyǵaryldy, barlyq aýditoriialar beine baqylaýmen jáne uialy bailanysty 100% basatyn qurylǵylarmen jabdyqtaldy. UBT ótkizý pýnktterinde beine kórsetilimi bar monitorlar ornatyldy. Memlekettik jáne apelliatsiialyq komissiianyń quramy bekitildi», — dedi A. Aimaǵambetov.
Óńirlerdiń Bas sanitarlyq dárigerlerimen kelisilgen qatal sanitarlyq-epidemiologiialyq talaptardy saqtaý jáne UBT-ǵa kirý kezi men ótkizý barysynda testilenýshilerdiń arasynda 2 metr qashyqtyqty saqtai otyryp UBT tapsyrý jospary ázirlendi.
