Foto: Astana soty baspasóz qyzmeti
Búgin eks-ministr Qýandyq Bishimbaevqa qatysty kezekti sot otyrysy ótip jatyr. Onda qaza bolǵan Saltanat Núkenovanyń aǵasy Aitbek Amangeldi Saltanatpen jazysqan habarlamasyn oqydy dep habarlaidy «Ult Aqparat».
Ol Saltanattan 20 naýryzda keshki 10 shamasynda habarlama alǵan. Onda Saltanattyń bet-júzi kógergen. Fotony alǵannan keiin Aitbek Amangeldi qaryndasyn óz úiine shaqyrǵanyn, Bishimbaevtan ketýge úgittegeni týraly baiandaidy. Al Saltanat ózin kinálap, aiyptalýshyny aqtaidy. Onymen ajyraspaitynyn, árqashan qasynda bolatynyn aitqan.
Jábirlenýshi taraptyń sózinshe 2022 jyldyń qazan aiynan bastap Saltanat jumys isteýdi toqtatqan.
Óz sózinde Amangeldi Núkenovaǵa otbasylyq zorlyq-zombylyq qurbandarymen jumys isteitin pstihologtyń telefon nomerin bergenin, biraq ol mamanǵa Bishimbaev barýǵa bas tartyp, reseilik psihologqa 12 myń dollar tólegenin aitty.
Sonymen qatar jábirlenýshiniń baiandaýynsha Bishimbaev Núkenovany úiden shyǵarmaǵan, jumys isteýge, qurbylarymen kezdesýge ruqsat bermegen, uiyqtatpaǵan. Aitbek Amangeldi qaryndasyna:
«Sen ol jerde qaraýyly bar túrmede siiaqtysyń... Ony emes, ózińdi aia...», -degen.
«Ol seni óltirip tastaýy múmkin» dep te aitqanyn jetkizdi jábirlenýshi. Saltanat aǵasyna Qýandyq ózin jaqsy kóretinin, barlyq armandaryn oryndap júrgenin, tek ómiri qiyn bolaǵanyn aityp, ony aqtaǵan. Bárine ózin kinálap, onysyz ómir súre almaitynyn jetkizgen.
«Tek meni bárine qyzǵanady, 24/7 meniń janymda bolǵysy keledi», -degendi aitqan.
Sodan keiin Saltanat aǵasy Aitbekke Qýandyq ony qanshalyqty syilaitynyn, ol týraly árqashan jaqsy sózder aitatyn jetkizgen.
Aitbek Amangeldi qaryndasymen hat almasyp júrgen, biraq Saltanattyń kúieýinen jábir kórip júrgenin ata-nasyna 24 naýryzda biraq aitqan. Ol ákesine Saltanattyń soqqy izderi bar sýretin kórsetken.
«25 naýryzǵa deiin týǵan-týystar eshteńe bilmedi. Oǵan deiin ylǵi meni olardyń otbasyna aralasyp jatqanym úshin keshirim sura deitin», -dedi jábirlenýshi.
Sonymen qatar sot otyrysynda Aitbek Amangeldi prokýrordyń suraǵyna jaýap berý kezinde qaryndasy uialy telefonyn Qýandyq AirTag arqyly ańdyp júrginine kúdiktenetinin aitqanyn jetkizdi.
Sonymen qatar ol aiyptalýshy jii sebepsiz aiqai-shý shyǵaratynyn da Núkenova aitqanyn esine túsirdi.
Jábirlenýshiniń sózinshe Saltanat Núkenova Qýandyq Bishimbaevtan 8 ret ketip, qaityp barǵan. Jáne eki ret musylmandyq dástúrmen meshitke baryp, nekelerin qidyrǵan.
Qaryndasynyń qazasyn Aitbek Amangeldi alǵash ret Saltanattyń qurbysynan estigenin aitady.
Aita keteiik, búgin, 29 naýryzda alqabilerdiń qatysýymen Astana qalasynda eks-ministr Qýandyq Bishimbaevqa qatysty sot otyrysy ótip jatyr. Burynǵy Ulttyq ekonomika ministri Qýandyq Bishimbaev azamattyq áieli Saltanat Núkenovany uryp óltirdi dep aiyptalyp otyr. Eske salaiyq, aiyptalýshy Bishimbaev óz kinásin moiyndamaidy.
