Indýstriia jáne infraqurylymdyq damý birinshi vitse-ministri Qaiyrbek Óskenbaev birjolǵy zeinetaqy tólemderin paidalaný arqyly turǵyn úi jaǵdaiyn jaqsartýdyń 5 baǵytyn atady, dep habarlaidy "Ult aqparat".
«Qaǵidalarǵa sáikes azamattardyń zeinetaqy jinaqtaryn paidalanýdyń 5 maqsaty kózdelgen:
- turǵyn úi satyp alý kezinde satyp alý-satý, jekeshelendirý, aiyrbastaý, bólip-bólip tóleý sharttary boiynsha, turǵyn úi qurylysyna úlestik qatysý týraly sharttar boiynsha, sondai-aq jer ýchaskesin satyp alýdy qosa alǵanda, jeke turǵyn úi salý úshin tolyq eseptesý;
- ipotekalyq qaryz alýǵa bastapqy jarna retinde, turǵyn úi satyp alýǵa, bereshekti óteýge, ipotekany bankter arqyly qaita qarjylandyrýǵa;
- turǵyn úi qurylys jinaqtary júiesi boiynsha jer ýchaskesin satyp ala otyryp, turǵyn úi satyp alýǵa nemese jeke turǵyn úi salýǵa arnalǵan ipoteka boiynsha bereshekti alý, qaita qarjylandyrý, óteý úshin;
- islam bankiniń qarjylandyrýy sheńberinde turǵyn úi satyp alý jáne osyndai qarjylandyrý boiynsha bereshekti óteý úshin;
- turǵyn úi qurylysy baǵdarlamalary men daǵdarysqa qarsy baǵdarlamalar sheńberinde berilgen satyp alý quqyǵymen turǵyn úidi uzaq merzimdi jaldaý sharttary boiynsha bereshekti óteý úshin», - degen ministrlik ókili turǵyndardyń usynysy boiynsha osy qaǵidatty jetildirý jumystary bastalǵanyn aitty.
«Búgingi kúni Ministrlik tetiktiń iske asyrylýyn jáne kelip túsken ótinishterdi taldaý qorytyndylary boiynsha Qaǵidalarǵa ózgerister men tolyqtyrýlar engizý týraly joba daiyndady. Joba barlyq múddeli organdarmen jáne akkredittelgen uiymdarmen kelisilgennen keiin belgilengen tártippen qabyldanady», - dedi Qaiyrbek Óskenbaev.
Onyń aitýynsha, qazirgi tańda 76 aýdanda 2 855 turǵyn úige qajettilik bar. Iaǵni olardyń qurylysyn sýbsidiialaý úshin respýblikalyq biýdjetten 14,3 mlrd.teńge bólý qajet.
