Birjan sal aýdanynyń prokýratýrasy muǵalimderdiń jalǵan diplommen sabaq ótkizgenin anyqtady, dep habarlaidy "Ult aqparat" Aqmola oblystyq prokýratýrasyna silteme jasap.
Vedomstvonyń deregi boiynsha, Birjan sal aýdanynyń prokýratýrasy oqýshylardyń sapaly bilim alýda quqyǵyn qorǵaý maqsatynda bilim zańnamasynyń saqtalýyna monitoring júrgizgen.
«Tekseris barysynda jalǵan diplomdy qoldanýdyń 15 oqiǵasy anyqtaldy. Arnaýly orta bilimi bar pedagogikalyq qyzmetkerler ailyǵyna qosymsha tólem alý úshin jalpy bilim beretin mektepterge joǵary bilimi týraly jalǵan diplomdardy usynǵan», - deidi vedomstvodan.
Jalǵan diplomy anyqtalǵan muǵalimder bastaýysh synyptarǵa, qazaq tili men ádebieti, dene shynyqtyrý, matematika jáne eńbek pánderinen sabaq ótkizgen.
«Jalǵan diplom úshin 15 muǵalimniń ústinen QR QK 385 babynyń 3 bóligi (jalǵan qujat, shtamp, mór, blank, poshta tólemderiniń memlekettik belgileri, memlekettik nagrada jasaý jáne saýdalaý) qylmystyq is qozǵaldy.
Kinásin moiyndap, ókingen ár pedagogke sot úkimimen 10 AEK (25 250 teńge) kóleminde aiyppul túrinde jaza qoldandy», dep tolyqtyrdy Aqmola oblystyq prokýratýrasyndaǵylar.
