Qarjy monitoringi agenttigi burynǵy densaýlyq saqtaý ministri Eljan Birtanov pen vitse-ministr Oljas Ábishevke qatysty sotqa deiingi tergeýdi aiaqtady, - dep habarlaidy "Ult aqparat".
Birtanov pen Ábishev Densaýlyq saqtaý ministrliginiń jaramsyz Aqparattandyrý platformasyn qabyldaý jáne paidalanýǵa berý arqyly laýazymdyq ókilettikterin asyra paidalandy degen kúdikke ilingen.
"Platforma Densaýlyq saqtaý júiesindegi problemalardy jedel sheshý úshin patsientter, dári-dármekter jáne meditsinalyq buiymdar týraly barlyq aqparatty biriktirýi kerek edi. Búginde platforma jumys istemeidi jáne ony meditsinalyq mekemelerdiń paidalanbaityny jinalǵan dáleldermen rastalady. Oryndalmaǵan jumystardyń quny 4,1 million dollar nemese 1,5 milliard teńge", - delingen habarlamada.
Sondai-aq, agenttik málimetinshe, Eljan Birtanov sanitariialyq aviatsiianyń áýe kemesin 2020 jylǵy maýsymda jeke maqsattarǵa paidalaný kezinde ókilettikterin asyra paidalandy degen kúdikke ilingen.
Biyl 7 shildede sotaldy tergep-tekserý aiaqtalǵany týraly jariialanyp, qylmystyq is materialdarymen tanysý bastaldy. Ózge aqparat QR QPK-nyń 201-babyna sáikes jariia etilmeidi.
Eske salaiyq, buǵan deiin eks-ministr sotta málimdeme jasaǵan bolatyn. Ol tergeý organdary oǵan áli aiyp taqpaǵanyn málimdedi.
"Keshe birqatar buqaralyq aqparat quraly prokýrordyń maǵan aiyp taqqany týraly qate nemese ádeii jazylǵan aqparat taratty. Sotqa qatysqan BAQ ókilderine maǵan áli aiyp taǵylmaǵanyn, tergeý áli júrip jatqanyn habarlaǵym keledi. Búgingi tańda kúdiktiń negizdiligi men kúdikti retinde meniń quqyǵymdy shekteý týraly másele ǵana qaralyp jatyr.
Aryzdy zerdelep, urlyq pen jymqyrý kúdikteriniń zańdylyǵy men negizdiligin rastaityn senimdi derekter joq ekenin aitqym keledi. Sebebi urlyq jasalǵan joq. Men densaýlyq saqtaý ministriniń mindetterin atqarǵanda osy iste de, basqalarynda da qandai da bir sybailas jemqorlyqqa qatysym joq ekenin taǵy da jariia túrde málimdeimin", - degen edi Birtanov.
