JRVI belgileri bolǵan jaǵdaida emhanaǵa barmai, jedel járdem shaqyrtý kerek. Bul týraly eldegi koronavirýs jaǵdaiy jaily onlain brifingte aityldy, dep habarlaidy QazAqparat.
«Meiirim» emhanasyndaǵy jaǵdaiǵa kelsek, naýqas óz erkimen dáriger kómegine júgingen. Emhanadaǵy meditsinalyq qyzmetker onymen bailanysta bolǵan, sol sebepti JRVI belgileri bolǵan jaǵdaida emhanaǵa barmai, jedel járdem shaqyrtýdy ótinemiz. Úsh ai buryn emhanaǵa barýǵa keńes bersek, qazir elordadaǵy jaǵdaiǵa bailanysty olai keńes bere almaimyz. Osy máselege bailanysty eki ai boiy seminar ótkizip jatyrmyz, biraq ókinishke qarai kei meditsinalyq uiymdar buǵan nazar aýdarmai, qyzmetkerleriniń basyn qaterge tigip qoiady. Bul jaǵdai olarǵa sabaq bolýy kerek» , - deidi QR Densaýlyq saqtaý ministri Eljan Birtanov.
Ol onkologiialyq ortalyqta virýs juqtyrǵan jaǵdaiǵa qatysty da pikir bildirdi.
«Bul jerde de virýs naýqastan juqpaǵan. Qazirgi ýaqytta epidemiologiialyq tekserý júrgizilip jatyr. Aldyn ala aqparat boiynsha, ol mamandandyrylǵan emes, qarapaiym kópsalaly aýrýhana bolǵan. Personal arasynda virýs jyldam juqqan. Qazirgi ýaqytta emhana jabyldy. Bizdiń maqsat – eń aldymen ol jerde jatqan naýqastardy emdep, qaýipsizdigin qamtamasyz etý. Ol jerdegi barlyq qyzmetshini tekserip, koronavirýs anyqtalǵandary aýrýhanaǵa jatqyzyldy. Endi ol emhana tolyq jabylyp, tolyq dezinfektsiia jasalady», - deidi ol.
