Qazaqstannyń burynǵy densaýlyq saqtaý ministri Eljan Birtanovtyń isi boiynsha tergeý aiaqtaldy. Qorǵaýshy taraptyń pikirinshe, tergeý kezinde kóptegen zań buzýshylyqqa jol berildi. Bul týraly eks-ministrdiń qorǵaýshysy Dmitrii Kýriachenko málimdedi, dep habarlaidy Sputnik Qazaqstan agenttigi.
"Tergeý aiaqtaldy. Tergeý aiaqtalýyna bes kún qalǵanda kúdik "jymqyrýdan" "ókilettikti asyra paidalanýǵa" aýystyryldy. Jalpy tergeý densaýlyq saqtaý ministrliginiń burynǵy basshysyn biýdjet qarajatyn jymqyrý kúdigi boiynsha 2020 jyldyń mamyrynda bastalǵanyn eske salǵym keledi. Alaida aqyrynda eshqandai jymqyrý faktisi joq ekeni anyqtaldy. Ony keiinnen qarjy monitoringi agenttigi de moiyndady. Biraq Birtanov ta, qorǵaýshysy retinde biz de eshqandai qylmys, jymqyrý joq ekenin qaita-qaita aityp keldik. Sonda qarjy monitoringi agenttigi jymqyrý faktisi bar degen málimdeme arqyly halyqty aldap otyrǵany ma?", - dedi Dmitrii Kýriachenko.
Ol anyqtalmaǵan "jymqyrý" qylmysy úshin Birtanovty tergeý izoliatorynda ustaǵanyn, keiinnen segiz ai úiqamaqta otyrýǵa ruqsat etkenin málimdedi. Eks-ministr qyzmettik ókilettigin asyra paidalaný boiynsha taǵylǵan aiypty da moiyndap otyrǵan joq.
"Meniń qorǵaýymdaǵy Birtanov taǵylǵan aiypty moiyndamaidy. Tergeý ádiletsiz ótti ári kóptegen zań buzýshylyqqa jol berildi. Munyń barlyǵy sotta dáleldenedi", - dedi advokat.
Kelesi sot otyrysy qashan ótetini ázirshe belgisiz. Zańgerdiń aitýynsha, qazir ispen tanysý satysy bastalyp jatyr.
Eske sala keteiik, 8 shildede Eljan Birtanov pen densaýlyq saqtaý ministriniń burynǵy orynbasaryna qatysty sotqa deiingi tergeý aiaqtalǵany belgili boldy.
Qarjy monitoringi agenttiginiń málimetinshe, olarǵa qyzmettik ókilettigin asyra paidalaný boiynsha aiyp taǵylyp otyr.
Sonymen qatar Birtanov 2020 jyldyń maýsymynda sanitarlyq aviatsiia tikushaǵyn jeke maqsatta paidalaný faktisi boiynsha qyzmettik ókilettigin asyra paidalandy dep aiyptalýda.
Aita keteiik, Qazaqstannyń burynǵy densaýlyq saqtaý ministri Eljan Birtanov 2020 jyldyń qazanynda ustaldy. Ol asa iri kólemde biýdjet qarajatyn jymqyrdy degen kúdikke ilindi. 7 qarashada eks-ministrge úi qamaýynda ustaý boiynsha bultartpaý sharasy qoldanylyp, onyń merzimi birneshe ret uzartyldy.
