QR Bilim jáne ǵylym ministrligi birneshe joǵary oqý ornynyń bilim berý litsenziiasynyń kúshin toqtatty. Bul sheshimge birqatar joǵary oqý ornyn qaita tekserý barysynda Bilim týraly zańnama normalarynyń buzylýy negiz boldy, dep habarlaidy "Ult aqparat" vedomstvonyń baspasóz qyzmetine silteme jasap.
«Almaty» ýniversiteti, «Qainar» akademiiasy, Almaty ekonomika jáne statistika akademiiasy, Qazaq meditsinalyq úzdiksiz bilim berý ýniversiteti, A.Qýatbekov atyndaǵy Halyqtar dostyǵy ýniversiteti jáne «Silkway» halyqaralyq ýniversitetin qaita tekserý qorytyndysy boiynsha bilim berý salasyndaǵy zańnama normalarynyń buzylýy qaita anyqtaldy.
Osyǵan bailanysty QR BǴM Bilim jáne ǵylym salasyndaǵy sapany qamtamasyz etý komiteti «Almaty» ýniversiteti, Almaty Ekonomika jáne statistika akademiiasy, Qazaq meditsinalyq úzdiksiz bilim berý ýniversiteti, A.Qýatbekov atyndaǵy Halyqtar dostyǵy ýniversiteti anyqtalǵan buzýshylyqtar joiylǵanǵa deiin litsenziiasynyń kúshin toqtatty.
«Qainar» Akademiiasy men «Silkway» halyqaralyq ýniversitetiniń isi tekserý qorytyndysyna shaǵymdanýyna bailanysty sotta qaralýda. Sot protsesi aiaqtalǵannan keiin tiisti sharalar qabyldanady.
Sonymen qatar M.H. Dýlati atyndaǵy Taraz óńirlik ýniversitetinde «quqyq» daiarlaý baǵyty boiynsha (bakalavriat) litsenziiaǵa qosymshanyń qoldanylýy toqtatyldy.
Osy rette talapkerlerdi zańnamaǵa sáikes bilim berý qyzmetin júrgizýge litsenziianyń qoldanylýy toqtatylǵan jaǵdaida joǵary oqý orny jańa 2020-2021 oqý jylyna qabyldai almaityndyǵyna nazar aýdarýlaryn suraimyz.
