QR Premer-Ministriniń orynbasary Eraly Toǵjanovtyń tóraǵalyǵymen ótken Koronavirýs infektsiiasynyń taralýyna jol bermeý jónindegi vedomstvoaralyq komissiianyń kezekti otyrysynda elimizdegi qazirgi epidemiologiialyq jaǵdai, halyqty jeke qorǵaný quraldarymen qamtamasyz etý, sheteldegi QR azamattaryn elge qaitarýdy uiymdastyrý jáne basqa da ózekti máseleler qaraldy.
Bul týraly QR Úkimetiniń baspasóz qyzmeti habarlady.
Densaýlyq saqtaý ministri Eljan Birtanov óz baiandamasynda keibir óńirlerde qarantin sharalaryn jeńildetý koronavirýspen aýyrǵandar sanynyń kóbeiýine sebep bolǵanyn atap ótti.
Osyǵan orai, Premer-Ministrdiń orynbasary Batys Qazaqstan, Qyzylorda, Mańǵystaý oblystary ákimdikterine óńir boiynsha sanitarlyq-epidemiologiialyq talaptardyń oryndalýyna baqylaýdy kúsheitýdi, onyń ishinde shekteý sharalaryn kúsheitý múmkindigin qarastyrýdy tapsyrdy.
«Óńir ákimdikteri sanitarlyq-epidemiologiialyq talaptardyń oryndalýyn qatań baqylaýda ustaýy tiis. Talaptardy oryndamaǵan biznes sýbektileriniń qyzmetin anyqtalǵan kemshilikterdi ornyna keltirgenshe ýaqytsha toqtatý qajet. Bul sharalar azamattarymyzdyń qaýipsizdigin qamtamasyz etý úshin asa mańyzdy», — dedi Eraly Toǵjanov.
Otyrys qorytyndysy boiynsha Premer-Ministrdiń orynbasary E. Toǵjanov birneshe naqty tapsyrmalar berdi.
