Buǵan deiin jerin qorǵaý úshin mitingke shyqqan qazaqtardy aqshaǵa satylǵan dep aiyptap, artynsha búkil qoǵamǵa kúlki bolǵan Birinshi arna tilshileri taǵy da mazaqqa ainaldy. Kúni keshe atalǵan telearna «arandatýshylardyń» mitingke shyǵýshylarǵa aqsha berip jatqan videosyn kórsetip, ózderiniń aiyptaýlaryn dáleldegisi kelgendei bolǵan. Alaida, olardyń aqtalý áreketteri kezekti ret sátsiz shyqty deýge tolyq negiz bar.
Tolyq negiz bar deitinimiz, kesheli beri áleýmettik jeli qoldanýshylary, onyń ishinde tanymal jýrnalister men blogerler, tipti shoý-biznes ókilderi de Birinshi arnanyń úsh jýrnalisin mazaqqa ainaldyryp, telekanaldy múldem jaýyp tastaýyn talap etýde.
«Eýraziialyqtardyń» sensatsiia dep kórsetken beineroligi birneshe sekýndqa sozylady. Onda betteri kórsetilmegen birneshe er jáne áiel adamnyń aqshany dollarmen alyp jatqany kórsetilgen. Túsirilim jasyryn túrde júrgizilipti. Biraq, jasyryn júrgizilse de aqshanyń 100 dollarlyq kýpiýra ekenin «arandatýshylar» men «búlikshiler» beinekameraǵa taqap kórsetken. Qysqasy bul roliktiń aldyn ala uiymdastyrylǵan «qoiylym» ekeni aiqyn kórinip tur.
Esterińizge salaiyq, buǵan deiin Birinshi arnanyń qos jýrnalisi Aimira Shaýkentaeva men Rýslan Smykov elimizdiń birneshe qalasynda uiymdastyrylǵan mitingterdiń artynda Batys turǵanyn, «búlikshilerdiń» árbirine 100 AQSh dollarynan berip jatqanyn aitqan bolatyn. Munysymen olar jurttyń ashýyn emes, kúlkisin týǵyzdy. Al, keshegi esh dáleli joq beinerolikti áleýmettik jeli paidalanýshylary sarkazmmen talqylap jatyr.
«Bul ne? Bul ne masqara? Tym tómen, múldem kásibilik joq. Túsinbedim, bular kimmen urysyp otyr? Úsheýi bir-birine jarty saǵat boiy munyń sensatsiia ekenin dáleldep álek», — deidi «31 arna» aqparat bóliminiń direktory Gúljan Muqusheva.
«Meniń oiymsha Dáýren Abaev (Aqparat jáne bailanys ministri) muny kórýi kerek!!! Eki ret kórýi kerek», — deidi telejúrgizýshi Dinara Satjan.
«Birinshi Eýraziia. Jabylyńdar. Dál bulai bolǵansha, múldem bolmaǵandaryń jaqsy. Senderdiń ázirlegenderiń báleniń jartysy ǵana. Senderdiń ózderiń qaýiptisińder», — deidi jýrnalist Azamat Erǵaliev.
Aita keteiik, Qazaqstandaǵy mitingter sáýir aiynda bastalǵan bolatyn. Eń alǵashqy bolyp alańǵa atyraýlyqtar shyqty. Keiin «jer satylmasyn» dep urandatqandar Aqtóbe men Aqtaýda, Semei men Jańaózende jáne Qyzylorda qalalarynda bas kótergen. Nátijesinde, Memleket basshysy Nursultan Nazarbaev Jer kodeksindegi birqatar normalarǵa moratorii jariialady. Iaǵni, aýylsharýashylyq jerleriniń jekemenshikke satylýyna, sheteldikterge jalǵa berilýine ýaqytsha tyiym saldy.
