Foto: piqsels.com
Astanadaǵy stomatologiialardyń birinde 3 jasar qyz qaza tapty. Bala sedatsiiadan keiin oianbai qalǵan. Buǵan qatysty qylmystyq is qozǵalyp, 21 qarashada sot otyrysy bastaldy, dep habarlaidy "Astana" arnasy.
Jábirlenýshi taraptyń aitýynsha, em kezinde meditsinalyq standarttar saqtalmaǵan. Balanyń miy isip, júregi toqtaǵan. Eger mamandar birden búkil tisti emdeýge tyryspaǵanda, bala aman qalýy múmkin edi deidi. Al dárigerler emsharanyń qaýipsiz ekenine sendirgen.
"9-da bastalǵan emshara túski ekige deiin sozylǵan. Jubaiym habarlasyp, bala oianbai jatyr, jedel-járdem keldi dedi. 40-45 minýt boiy balanyń esin jidyrmaqshy bolyp, alǵashqy kómek kórsetken. Keiin bizge balanyń júregi toqtap, miy isip ketkenin jetkizdi", - deidi marqumnyń ákesi Talǵat Qumarov.
Telearna málimetinshe, tekserý kezinde klinikada merzimi ótken dáriler, sertifikatsyz preparattar qoldaný jáne uzaq sedatsiia standarttaryn buzý jaǵdailary anyqtalǵan. Sapany baqylaý departamenti men keshendi sot saraptamasy anesteziolog pen stomatologtyń qateligin kórsetken, biraq tek anesteziolog tergelip, stomatolog áli kúnge deiin jumysyn jalǵastyryp jatyr deidi jábirlenýshi tarap. Olar barlyq dárigerdiń jaýapqa tartylýyn talap etedi. Alǵashqy sot otrysy advokattyń kelmeýine bailanysty keiinge qaldyryldy.
"Is anesteziia mamanyna qatysty. Biz ony jumystan shyǵardyq. Men ol jerde bolǵan joqpyn, eshteńe dep sizge pikir bildire almaimyn. Óitkeni ózim de naqty eshteńeni bilmeimin", - deidi klinika direktory Nadejda Hon.
