videodan alynǵan kadr
Májilis depýtaty Rinat Zaiytov otbasyndaǵy bir balanyń qylmysy úshin jaýapkershilikti búkil áýletke teńdei bólýdi usyndy, dep habarlaidy Sputnik Qazaqstan.
Onyń aitýynsha, qazir balanyń qylmysy úshin áke nemese ana kináli dep bólip jarady.
"Atam qazaq "otbasy – shaǵyn memleket" deidi. Jaýapkershilikti teńdei bólý kerek. Bir otbasynda bir bala shikilik shyǵardy ma, ata-anasy, búkil áýlet jaýap bersin. Iaǵni memleketten tólenetin qosymsha tólemderden qaǵyp tastai ma, ata-anasynyń jumysynda sógis bere me, memleket áýlettiń bir múshesiniń jasaǵan qylmysyn teńdei bólip alsyn. Sonda ǵana olar aqyldasyp, bireýiniń ziiany bireýine tietin bolǵannan keiin bir-birine jany aýyrady. Al qazir kórip otyrmyz ǵoi, nebir sheneýnikterdiń balasy kisi óltirse de, úndemeidi. Ol durys emes. Bala 18 jasqa tolǵansha ata-ananyń qaramaǵynda ma, onda búkil ata-anasymen, memleketimen jaýap bersin", - deidi Rinat Zaiytov Májilistiń áleýmettik-mádeni damý komitetiniń otyrysynda.
Sondai-aq ol oqýshynyń mektepke aparatyn telefonynyń markasynan bastap qaltasyndaǵy aqshasyna deiin shekteý qoiý kerek dep sanaidy.
"Problemanyń bári osydan shyǵady. Bireý bireýdiń telefonyna qyzyǵady, bireýdiń balasynyń qolynda 5 myń teńge aqsha bar, dúkenge aparamyn deidi de oiyndaǵysyn istetedi", - deidi májilismen.
Budan bólek, depýtat qoǵamǵa, mektepke qaýipti balalardy oqshaýlaýdy, iaǵni olardyń basqa mektepke aýystyrylýyn qamtamasyz etýdi qolǵa alýdy usyndy.
"Buryn mektepterde kezekshi ýchaskelik politsei degen bolatyn. Solardy qaitarý kerek. Tárbie meńgerýshisi onymen ainalysa almaidy. Mektepten shyqqan balanyń qai buryshta temeki tartyp, tóbelesetinin bilip júretin kezekshi ýchaskelik politsei kerek. Áitpese qazir eshkim bilmeidi", - deidi Zaiytov.
Sonymen qatar depýtat telearnalarda otbasylyq janjaldardy talqylaýdy toqtatýdy talap etti.
"Aqparat ministrligine tikelei qatysy bar. "Astarly aqiqat" degen baǵdarlamalardy jabý kerek", - dep málimdedi májilismen.
