«Nur Otan»-nyń partiiaishilik sailaýynda onlain-daýys berýge qatysý úshin «Praimeriz» aqparattyq júiesine 700 myńǵa jýyq partiia múshesi tirkeldi. Bul týraly partiianyń baspasóz qyzmeti habarlady.
Partiia baspasóz qyzmetiniń málimetinshe, «Nur Otan» praimerizine 11 myńǵa jýyq úmitker qatysýda. Elimiz boiynsha orta eseppen bir orynǵa tórt adam úmitker bolyp otyr. Kandidattardyń 70%-y ózin-ózi usynǵandar, al myńǵa jýyǵy – partiianyń jańa músheleri. 37%-y – áielder, 29%-y – 35 jasqa deiingi jastar. Qatysýshylardyń ortasha jasy – 43 jas.
7 qyrkúiekten bastap praimerizge qatysýshylar 800 myńnan astam adamdy tikelei qamti otyryp, 32 myńnan asa úgit-nasihat is-sharasyn ótkizdi. 14 qyrkúiekten bastap onlain-formatta jariia pikirsaiystar bastalady. Onda qatysýshylar naqty eldi mekenderdiń túiindi máselelerin sheshý jónindegi óz paiymdaryn ortaǵa saldy.
«Elbasy, Partiia Lideri Nursultan Nazarbaev elimizdegi azamattardy alańdatqan máselelerdi birlesip sheshý úshin ashyq dialogty qamtamasyz etýdiń mańyzdylyǵyn atap ótti. Halyqpen keńinen talqylaý maqsatynda «Nur Otan» partiiasy árbir óńir, qala jáne aýdan boiynsha 216 sailaýaldy baǵdarlamanyń jobalaryn jariialady. Olardy el Prezidenti Qasym-Jomart Toqaevtyń Qazaqstan halqyna Joldaýynda qoiylǵan mindetterdi, sondai-aq, «Halyq únine qulaq asatyn memleket» tujyrymdamasy aiasynda azamattardyń usynystaryn eskere otyryp pysyqtaidy. Birneshe kúnniń ishinde praimerizge qatysýshylar 8 myńnan asa talap-tilekter men usynys jinady», - dedi partiianyń baspasóz qyzmeti.
Aita ketsek, «Nur Otan» praimeriziniń basty maqsaty – aldaǵy Májilis pen barlyq deńgeidegi máslihattar sailaýyna partiialyq tizimderge engizý úshin qoǵamnyń senimi men qoldaýyna ie bolǵan bedeldi partiia kóshbasshylaryn anyqtaý.
Sondai-aq, partiia elektrondyq daýys berýdi uiymdastyrý úshin mobildi qosymsha men primaries.kz veb-portalynyń múmkindikterin paidalanýdy josparlap otyr. Ashyqtyqty qamtamasyz etý úshin «bir daýys, bir JSN, bir mobildi nómir jáne bir IP-adres» qaǵidaty boiynsha rastaý (verifikatsiia) júiesi qoldanyldy.
Kandidattardyń reitingisi bar praimerizdiń qorytyndysy 5 qazanda jariialanady.
.jpeg)