QR Memlekettik bas sanitarlyq dárigeri Aijan Esmaǵambetova karantin – koronavirýs infektsiiasynyń aldyn alýdyń birden-bir joly bolyp qala beretinin eske saldy, dep habarlaidy "Ult aqparat".
«Halyqtyń nazaryn myna jaitqa aýdarǵym keledi: infektsiianyń taralý órisine taldaý júrgize otyryp, bir naýqastyń virýsty 80 adamǵa juqtyrýy múmkin ekenin bilip otyrmyz. Karantin kezinde de kórshiler bir-birimen áńgime-dúken qurýdy doǵarar emes. Artynsha bir-birine virýs juqtyrady. Mundai jaǵdailar da bizde kezdesti. Ortasha eseppen bizde koronavirýs juqtyrǵan 1 adamǵa bailanysta bolǵan 30 adamnan keledi. Qazirgi tańda juqtyrǵan adamdardyń 70 paiyzy aýrý belgisin baiqamai ótip ketetinin kórip otyrmyz. Demek aýrýdyń qyldai belgisi joq sap-saý adamnyń ózi basqa adamdar úshin infektsiia taratýy múmkin», - dedi Aijan Esmaǵambetova OKQ-da onlain rejimde ótken baspasóz máslihatynda.
Memlekettik bas sanitarlyq dáriger osy sebepti karantin – koronavirýs infektsiiasynyń aldyn alýdyń birden-bir joly bolyp qala beretinin jetkizdi.
«Úide bolyńyzdar. Asa qajettilik týyndamasa syrtqa shyqpaǵan abzal. Tártip qanshalyqty saqtasaq, sonshalyqty jyldam qalypty ómirge oralamyz», - dedi ol.
Aijan Esmaǵambetovadan baspasóz máslihaty barysynda «karantin tártibi Qazaqstanda mamyr aiyna deiin sozyla ma?» degen suraq qoiyldy. Bul suraqtyń jaýabyn da bas memlekettik sanitarlyq dáriger joǵaryda sóilegen sózine úndes jaýap berdi.
«Qazaqstan Prezidenti janyndaǵy Tótenshe jaǵdai rejimin qamtamasyz etý boiynsha memlekettik komissiia TJ rejimi 30 sáýirge deiin uzartylǵanyn bilesizder. Karantin ary qarai sozyla ma – ol ózimizge bailanysty bolmaq. Karantin sharalaryn qanshalyqty saqtaimyz, óz-ózimizdi qanshalyqty oqshaýlaýǵa qaýqarlymyz, qanshalyqty qozǵalysty azaitamyz – bári osy máselege kep tireledi», - dedi ol.
