Básekelestikti qorǵaý jáne damytý agenttiginiń memlekettik satyp salasyndaǵy bir kózden satyp alý tetigine jol beretin negizdemelerdi 50 paiyzǵa qysqartý týraly usynysy memlekettik organdar tarabynan qarsylyqqa tap bolǵan, dep habarlaidy QazAqparat.
Bul týraly agenttik tóraǵasy Serik Jumanǵarin «QazAqparat» halyqaralyq aqparat agenttiginiń alańynda ótken Orep Space kezdesýde aitty.
«Biz eń aldymen monopoliiaǵa qarsy zańnamaǵa ózgerister men túzetýler engizýge kiristik. Jýyqta Parlamentke besinshi paketin ótkizemiz. Eń áýeli bir kózden satyp alýǵa jol beretin negizderdi qysqartýǵa mán berdik. Olardyń sanyn 52-den 25-ke deiin túsirgimiz keldi. Memlekettik organdardyń tarabynan qasarysqan qarsylyq sezindik. 17 negizdemeni múldem alyp tastaǵymyz kelgen. Biraq tek úsheýi ǵana alyp tastalyndy. Bul alǵashqy qadamdar deýge bolady. Bári birden bola ketpeitini túsinikti», - degen agenttik basshysy budan bólek 6 negizdeme boiynsha eleýli shekteýler engizilgenin atady.
«Esesine biz ózimiz usynǵan 8 negizdemeniń ishinde 6 negizdeme boiynsha bir kózden satyp alý múmkindigin shektei aldyq. Iaǵni, bu jerde bir kózden satyp alýǵa ruqsat berýdi bizdiń agenttik bekitedi. Al bizdiń agenttik ondaiǵa óte sirek ruqsat beredi.
Sonda 3 negizdemeni múlde joiyp, 6 negizdeme boiynsha shekteý qoiý arqyly jylyna 50 mlrd teńgeni únemdeýge múmkindik jasadyq. Únemdedik degende, bul qarajat básekeli ortaǵa beriledi. Az aqsha emes, árine», - deidi Serik Jumanǵarin.
