Ulttyq bank tóraǵasynyń orynbasary Áliia Moldabekova teńgeniń aiyrbas baǵamyna qatysty jaǵdaidy túsindirdi, dep habarlaidy "Ult aqparat".
Teńgeniń AQSh dollaryna shaqqandaǵy baǵamy 30 qyrkúiektegi saýda-sattyqtyń ashylýynda bir dollar úshin 431 teńge belgisinen asty jáne aldyńǵy kúnniń jabylýymen salystyrǵanda 0,4%-ǵa álsiredi.
«Munai baǵasynyń quldyraýy ulttyq valiýtany álsiretti jáne naryqtyń budan bylaiǵy perspektivalary men kómirsýtekterge suranysqa qaýip tóndiredi.
Koronavirýstyq infektsiiamen aýyrý jaǵdailarynyń ulǵaiýy aiasynda álemde otynǵa ornyqty suranystyń uzaq ýaqyt boiy qalpyna kelý jáne álemdik ekonomikanyń ósý táýekelderi kúsheidi. Kóptegen ekonomister men naryq oiynshylarynyń kútýleri boiynsha munaidy tutynýdyń aitarlyqtai ósýi keiingi 1,5-2 jylda ǵana oryn almaq. Sonymen qatar, Liviiada shikizat óndirýdiń áleýetti qalpyna keltirilýi munai baǵasyn belgileýge qysym kórsetti», - dedi Áliia Moldabekova.
Nátijesinde 29 qyrkúiekte Brent surypty munai barreliniń quny $42,43 dollardan $41,03 dollarǵa deiin nemese 3,3%-ǵa, al WTI surypty munai barreliniń quny $40,6 dollardan $39,29 dollarǵa nemese 3,2%-ǵa tómendep, $40 dollarǵa jetti.
Ulttyq bank baspasóz qyzmetiniń habarlaýynsha, Brent $40,54 dollar deńgeiinde saýdalanady, bul aidyń basyndaǵy deńgeiden 10,5%-ǵa tómen. Osy kezeńde teńge baǵamy 431,64-ke deiin 2,7%-ǵa álsiredi.
Jalpy alǵanda, álemdik qarjy naryǵynda qubylmalylyqtyń ósýi jáne jahandyq «risk-off» baiqalady, bul damýshy naryqtar valiýtalarynyń teris serpinine áser etedi. Aidyń basynan bastap túrik lirasy 6,7%-ǵa, Braziliia realy men Meksika pesosy 2,6%-ǵa qunsyzdandy. Resei rýbli qyrkúiek aiynyń basynan beri 6,6%-ǵa aitarlyqtai tómendedi.
29 qyrkúiekte Resei rýbli eń tómengi kórsetkish 79,97-ge jetti. Rýbl baǵamynyń álsireýi geosaiasi táýekelderdiń ósýine jáne EO sanktsiialyq tizimderiniń keńeiý yqtimaldyǵy týraly habarlarǵa bailanysty boldy.
