Biologiialyq qaýipsizdik jónindegi halyqaralyq agenttik qurý úshin jumysty jandandyrý kerek. Bul týraly QR Syrtqy ister ministrliginiń keńeitilgen alqa májilisinde QR Prezidenti Qasym-Jomart Toqaev málim etti, dep habarlaidy QazAqparat agenttigi.
«Búkil álemdi pandemiia jailaǵanyna eki jylǵa jýyqtady. Onyń saldary Qazaqstanǵa da ońai tigen joq. Bizdiń diplomatiialyq korpýs osy kúrdeli kezeńde joǵary deńgeide qyzmet etti. Sheteldegi myńdaǵan azamatymyzǵa kómek kórsetti. Syrtta qalyp qoiǵan otandastarymyzdy elge alyp kelý úshin tiisti jumys atqardy. Diplomattarymyzdyń arqasynda Qazaqstanǵa gýmanitarlyq kómek jetkizildi. Biz de birqatar memleketterge qoldaý kórsettik. «Vaktsinalyq diplomatiianyń» arqasynda Ortalyq Aziiadaǵy indetke bailanysty ahýaldy turaqtandyrýǵa úles qostyq. Túrli qiyndyqqa qaramastan, Sizder aldymyzda turǵan strategiialyq mindetterdi oryndap kelesizder», - dedi Prezident diplomattarǵa qarata aitqan sózinde.
Memleket basshysy elimiz EKOSOS-qa jáne Birikken Ulttar Uiymynyń Adam quqyqtary jónindegi keńesine sailanǵanyn eske saldy.
«Biyl teńizge tikelei shyǵa almaityn elder tobyna tóraǵalyq etip otyrmyz. Basqa da mańyzdy bastamalarymyzdy júzege asyrý úshin aýqymdy sharalar qolǵa alyp jatyr. Biologiialyq qaýipsizdik jónindegi halyqaralyq agenttik qurý úshin jumysty jandandyrý kerek. Aýǵanstandaǵy kúrdeli gýmanitarlyq daǵdarysty eńserýge óz úlesimizdi qosyp jatyrmyz. Bul – bizdiń syrtqy saiasatymyzdyń jasampazdyq sipatynyń aiqyn kórinisi», - dedi Qasym-Jomart Toqaev.
