Bilim jáne ǵylym vitse-ministri Fatima Jaqypova ǵylymi dáreje men ataqty zańsyz taǵaiyndaý máselesi boiynsha ózine qatysty aiyptaýǵa jaýap berdi, dep habarlaidy "Ult aqparat".
«Birqatar buqaralyq aqparat quraldarynda, áleýmettik jelide sybailas jemqorlyq jáne ǵylymi dáreje men ataqty zańsyz taǵaiyndaý týraly maǵan qatysty aqparat tarap jatyr. Búgin Ulttyq memlekettik ǵylymi-tehnikalyq saraptama ortalyǵy dissertatsiiany tekserdi. Qazaqstanda jazylatyn ǵylymi eńbekterdi plagiatqa tekseretin jalǵyz baǵdarlama tek atalǵan ortalyqta bar. Anyqtama skrinshotyn nazarlaryńyzǵa usynamyn», - degen vitse-ministr qujattyń fotosýretin Facebook paraqshasyna júktedi.
Fatima Jaqypova óziniń myńdaǵan áriptesi siiaqty ǵylym kandidaty, ǵylym doktory dárejelerin alýdyń barlyq kezeńderinen: jumysty kafedrada talqylaýdan sarapshylar jáne opponentterdiń, kópshiliktiń aldynda qorǵaýǵa deiingi satylardan tolyq ótkenin málim etti.
«2011 jyldan bastap Qazaqstan kandidattyq jáne doktorlyq dárejelerden bas tartyp, tolyqtai filosofiia doktory - PhD dárejesine aýysty. Dissertatsiialyq jumystarǵa qoiylatyn talap ózgerdi. Basylymdarǵa jáne dáieksóz alýǵa qatysty halyqaralyq ustanymdar qosyldy. Naqty aityp ketetin taǵy bir jait: 2011 jylǵa deiin ǵylymi dárejeni berý sol kezdegi erejelerge sáikes dissertatsiialardy Antiplagiat baǵdarlamasy arqyly tekserý múlde bolǵan joq. Ol tek jańa júie sońǵy jańa erejelerde kórsetilip, filosofiia doktory - PhD dárejesine ǵana qoldanyla bastady. Iá, bul alǵa basqan durys qadam boldy. Biraq eshqandai jaǵdaida da elimizdiń myńdaǵan ǵalymynyń – meniń áriptesterimniń ǵylymi eńbekterin synaý men olardy joqqa shyǵarý maqsatynda emes!» - deidi ol.
Fatima Jaqypovanyń aitýyna qaraǵanda, 2011 jylǵa deiin ǵylymi dáreje Bilim jáne ǵylym ministriniń 2003 jylǵy 10 qańtardaǵy №16 buiryǵymen bekitilgen jáne 2011 jylǵa deiin kúshinde bolǵan erejelerge sáikes berilgen. Osylaisha, 10-shy tarmaqqa sáikes, avtor jańa sheshimderdi naqty túrde dáleldep, syni baǵalaýy tiis bolatyn. Sonymen qatar, avtorlarǵa uiymdardan ǵylymi tujyrymdardyń tájiribelik máni jáne ǵylymi tujyrymdardy paidalaný boiynsha keńester usynylatyn.
«Atalǵan erejeniń 11-shi tarmaǵynda dissertatsiianyń negizgi mazmuny keminde 30 ǵylymi eńbekte, onyń ishinde, 10 jeke, 3 sheteldik ǵylymi basylymda jáne Qazaqstan Respýblikasy Bilim jáne ǵylym ministrligi Bilim jáne ǵylym salasyndaǵy qadaǵalaý men attestattaý komiteti bekitken tizbedegi (keminde bes túrli ataý) 10 basylymda jariialanýy kerektigi aitylǵan. Men atalǵan talaptardy tolyǵymen saqtai otyryp, eńbekterimdi tiisti jariialanymdarda basyp shyǵardym. Sonymen qatar, kez kelgen adam avtordyń qorǵaýǵa usynǵan erejelerimen ashyq túrde tanysa alady. 15-shi tarmaqta dissertatsiia ázirlengen uiym dissertatsiianyń aldyn ala saraptamasyn ótkizetini kózdelgen. Meniń jumysym boiynsha, dál solai barlyq basqa da jumystar boiynsha ǵylymi jańashyldyqtyń bolýyna, ózektiligine jáne tájiribelik mánine qatysty saraptama júrgizetin retsenzentter taǵaiyndalyp, olar dissertatsiia boiynsha oń pikir berdi», - deidi Fatima Jaqypova.
Vitse-ministrdiń aitýynsha, jumysty sondai-aq úsh opponent tekserip, dissertatsiianyń jańa ǵylymi nátijeleri men avtordyń kópshilik aldyna usynylatyn erejeleriniń jiyntyǵyna qatysty syni baǵalai otyryp, qorǵaýǵa jiberýge bolatynyn anyqtaidy.
«Ol satydan da meniń dissertatsiiam durys ótti. Barlyq qorǵaý kezeńderinen ótý zańdylyǵyn rastaityn qujattar bir aidyń ishinde Bilim jáne ǵylym salasyndaǵy qadaǵalaý men attestattaý komitetine usynylatyn, onda jumys taǵy bir ret táýelsiz sarapshylardyń qatysýymen saraptamadan ótedi, ol satydan dissertatsiia sátti ótti. Tek barlyq kezeńderden sátti ótken soń ǵana ǵylymi dáreje beriletin. Ǵylymi dárejeni berý zańdylyǵyn rastaityn barlyq qujattar muraǵatta 75 jyl boiy saqtalady. Eń sońǵy aitarym. Osyǵan deiin maǵan jáne meniń áriptesterime qatysty taratylǵan jalǵan aqparat boiynsha ar-namysymyzdy, abyroiymyzdy jáne iskerlik bedelimizdi qorǵaý týraly talap-aryz sotqa joldanyp, sot óndirisine qabyldandy», - dep jazdy Fatima Jaqypova.
