Memleket basshysynyń joǵary bilim berý sapasyn qamtamasyz etý jónindegi tapsyrmasy aiasynda BǴM tiisti sharalardy qabyldap jatyr, dep habarliady "Ult aqparat".
QR BǴM Bilim jáne ǵylym salasyndaǵy sapany qamtamasyz etý komiteti 25 joǵary oqý ornynyń kadrlardy daiyndaý baǵyttary boiynsha litsenziiasyna 60 qosymshasyn qaitaryp aldy. Olardyń basym bóligi Komitettiń tekserisinen keiin qaitaryldy.
Negizinen bul JOO-lar «Pedagogikalyq ǵylymdar», «Óner», «Gýmanitarlyq ǵylymdar», «Jaratylystaný ǵylymdary», «Tehnika ǵylymdary», «Qyzmet kórsetý» jáne «Áleýmettik jumys», «Áleýmettik ǵylymdar» baǵyttary boiynsha kadrlar daiarlaýdy júzege asyrdy.
Júrgizilgen tekserý nátijeleri boiynsha JOO-lar normativtik quqyqtyq aktilerdi saqtamaǵany anyqtaldy. Olqylyqtarǵa negizinen talapkerlerdi qabyldaý, professor-oqytýshylar quramynyń biliktiligin arttyrý, konkýrs arqyly almastyrý, oqý júktemesin josparlaý, bilim alýshylardy qorytyndy attestattaý, diplom blankilerin esepke alý jáne t.b. boiynsha jol berilgen.
