Bilim jáne ǵylym vitse-ministri Sholpan Karinova 1 naýryzdan bastap mektepterdegi ruqsat etilgen aralas formatta oqytýdy túsindirip berdi, dep habarlaidy "Ult aqparat".
Vitse-ministr Facebook-tegi paraqshasynda 1 naýryzdan bastap Qazaqstan Respýblikasynyń Bas memlekettik sanitariialyq dárigeriniń 2021 jylǵy 27 aqpandaǵy № 9 qaýlysyna sáikes, sondai-aq sanitariialyq-epidemiologiialyq jaǵdaidyń jaqsarýy men turaqtanýyna bailanysty, jalpy bilim beretin mektepterdiń 1-5 synyp jáne halyqaralyq mektepterdiń 1-7 synyp bilim alýshylaryn aralas formatta oqytýǵa ruqsat etilgenin jazdy.
«Óńirlerdegi sanitariialyq-epidemiologiialyq jaǵdaidy eskere otyryp, qai oqý pánderiniń shtattyq nemese qashyqtan oqytý formattarynda júrgizilýin jáne oqý saǵattarynyń sanyn anyqtaýdy mektepter derbes sheshedi. Bul rette mektepter osy oqý jylynda qoldanystaǵy jumys oqý josparlaryn basshylyqqa alady. Sonymen qatar, Bilim jáne ǵylym ministrligi «Kórkem eńbek» jáne «Mýzyka» pánderin 1-5 synyptarda qashyqtan asinhrondy formatta qaldyrýdy, qalǵan pánderdi shtattyq formatqa kóshirýdi usynady.
Tek erekshe jaǵdailarda, aýyrǵanda nemese naýqastarmen qarym-qatynas jaǵdailarynda ata-analardyń ótinishi boiynsha balalardy qashyqtan formatynda oqytýǵa qaldyrýǵa ruqsat etiledi», - dedi Sholpan Karinova.
Onyń aitýynsha, bilim berý protsesiniń barlyq qatysýshylary sanitariia –epidemiologiia talaptaryn saqtaýy tiis.
«Mektep basshylary balalardyń qaýipsizdigin jáne densaýlyǵyn saqtaý úshin barlyq jaǵdailardy qamtamasyz etedi. Bilim alýshylar men pedagogter jeke gigiena erejelerin jáne sanitariialyq qaýipsizdik sharalaryn saqtaidy.
Ata-analar tarapynan balalardyń jeke gigienany saqtaýy jáne áleýmettik qashyqtyqty saqtaý qajettigin túsindirý óte mańyzdy.
1-5 synyptardyń barlyq oqýshylaryn mektepke qaitarý bastaýysh mektep deńgeiinde bazalyq bilimniń, qajetti daǵdylar men quzyretterdiń qalyptasýymen bailanysty bolyp otyr. Olar úshin áleýmettený jáne qarym-qatynas protsesteriniń jalǵasýy, oqytý kezinde ujymdyq ózara qarym-qatynastyń qol jetimdi bolýy mańyzdy. Sondyqtan birinshi kezekte osy synyptar boiynsha sheshim qabyldandy», - Sholpan Karinova.
Vitse-ministrdiń aitýynsha, oqýshylarǵa mektepke mindetti mektep formasynda emes, erkin, uqypty jáne jinaqy kiimde bolýǵa ruqsat etiledi. Ata-analarǵa mektep formasyn satyp alýdyń qajeti joq.
«1 naýryzdan sabaqtan tys ýaqytta bilimdegi olqylyqtardy tolyqtyrý úshin oqýshylardy jeke oqytý 15 adamnan aspaityn toptarda múmkin bolady. Bul jaǵdai áli de qashyqtan oqytýda qalyp otyrǵan 6-8, 10 synyptarǵa qatysty. Bul mindetti emes, muǵalimderdiń sheshimi men oqýshylardyń ata-analarynyń kelisimi boiynsha iske asyrylady.
Balalardyń jekelegen sanattarynyń tamaqtanýy, turýy, tasymaldanýy óńirlerdiń bas memlekettik sanitariialyq dárigerlerimen kelisilip qamtamasyz etiledi.
Barlyq qabyldanǵan sheshimder ata-analarǵa aldyn-ala jetkizilýi kerek», - dedi Sholpan Karinova.
