Bilim uiymdaryna terrorizmge qarsy qorǵanysta qoiylatyn jańa talaptar bekitildi. Bul týraly QR BǴM Mektepke deiingi jáne orta bilim komitetiniń tóraiymy Maira Meldebekova aitty, dep habarlaidy QazAqparat.
«QR Úkimetiniń 2021 jylǵy 6 mamyrdaǵy qaýlysymen nysandardy terrorizmge qarsy qorǵanysqa qoiylatyn jańa talaptar bekitildi. Bul talaptar keshe kúshine endi. Árbir bilim berý uiymyna qoiylatyn eki talap bar: negizgi jáne qosymsha. Árbir bilim berý uiymy osy qaýlyda kórsetilgen negizgi talaptardy oryndalýyn qamtamasyz etýi tiis. Negizgi talapqa beinebaqylaý júiesi, dybystyq habarlandyrý júiesi, dabyl berý túimesiniń bolýy kiredi. Qosymsha talapqa tehnikalyq tekserý quraldary, baqylaý júiesi, kúzet dabylynyń bolýy jatady», - dedi Maira Meldebekova ministrliktiń apparat jinalysynda.
Onyń atap ótýinshe, terrorizmge qarsy qorǵanysty uiymdastyrý nusqaýlyǵy da atalǵan qaýlyda kórsetilgen. Olarǵa ruqsat arqyly ótkizý rejimin, terroristik sipattaǵy kórinisterge qarsy is-qimyldardy uiymdastyrý, terrorizmge qarsy qorǵanys pasportyn ázirleý, nysandardy tehnikalyq jabdyqtaý kiredi.
«Beinebaqylaý júiesimen jabdyqtaý standarttary men talaptary Bilim jáne ǵylym ministrligi men Ishki ister ministrliginiń birlesken buiryǵymen bekitilgen. Negizgi talaptar: árbir beinebaqylaýdyń bir jáne odan kóbirek jazý rejiminiń bolýy, muraǵattan joiý jáne ózgertýden qorǵalýy, beinejazbany naqty ýaqyt rejimde berip otyrý múmkindigi, beineni bir ýaqytta birneshe kamerada muraǵattan qaraý múmkindiginiń bolýy, elektr energiiasy sóngen jaǵdaida da kameralarynyń úzdik jumys isteýi», - dedi ol.
