Erteń Senattyń jalpy otyrysynda «Pedagog mártebesi týraly» zań jobasy qabyldanýy múmkin. Bul týraly búgin Úkimet úiindegi baspasóz máslihatynda QR Premer-Ministriniń orynbasary Berdibek Saparbaev aitty, dep habarlaidy QazAqparat.
«Memleket basshysynyń bergen tapsyrmasy bar. Eń negizgisi biz bilimniń sapasyn kóterýimiz kerek. Ol úshin birinshiden, muǵalimderge jaǵdai jasaýymyz kerek. Ekinshiden, bilim salasynyń materialdyq-tehnikalyq bazasyn nyǵaitýymyz qajet. Al ol úshin qazirgi tańda 2020-2025 jyldarǵa arnalǵan memlekettik baǵdarlama Úkimet tarapynan bekitildi», - dedi ol.
Premer-Ministr orynbasarynyń aitýynsha, muǵalimderdiń jalaqysy qańtar aiynan bastap orta esepen 25-30 paiyzǵa ósedi. 4 jyldyń ishinde 2,5 ese artady. Al Úkimet qabyldaǵan, bekitken baǵdarlamanyń arqasynda mektepke deiingi jastaǵy balalar balabaqshamen 100 paiyz qamtylady. 2025 jylǵa deiin úsh aýysymdy, apatty jaǵdaidaǵy mektepterdiń barlyǵy joiylady. Mektepter 100 paiyz internetpen qamtamasyz etilip, internattar ashylady, qosymsha sport zaldar salynady.
«Ózderińiz bilesizder, qazir Senatta muǵalimderdiń mártebesi jónindegi zań jobasy qaralyp jatyr. Bizdiń josparymyz boiynsha erteńgi otyrysta ol qabyldanatyn shyǵar. Odan keiin Memleket basshysynyń qol qoiýyna jiberiledi», - dedi Berdibek Saparbaev.
