ەرتەڭ سەناتتىڭ جالپى وتىرىسىندا «پەداگوگ مەرتەبەسٸ تۋرالى» زاڭ جوباسى قابىلدانۋى مٷمكٸن. بۇل تۋرالى بٷگٸن ٷكٸمەت ٷيٸندەگٸ باسپاسٶز مەسليحاتىندا قر پرەمەر-مينيسترٸنٸڭ ورىنباسارى بەردٸبەك ساپارباەۆ ايتتى, دەپ حابارلايدى قازاقپارات.
«مەملەكەت باسشىسىنىڭ بەرگەن تاپسىرماسى بار. ەڭ نەگٸزگٸسٸ بٸز بٸلٸمنٸڭ ساپاسىن كٶتەرۋٸمٸز كەرەك. ول ٷشٸن بٸرٸنشٸدەن, مۇعالٸمدەرگە جاعداي جاساۋىمىز كەرەك. ەكٸنشٸدەن, بٸلٸم سالاسىنىڭ ماتەريالدىق-تەحنيكالىق بازاسىن نىعايتۋىمىز قاجەت. ال ول ٷشٸن قازٸرگٸ تاڭدا 2020-2025 جىلدارعا ارنالعان مەملەكەتتٸك باعدارلاما ٷكٸمەت تاراپىنان بەكٸتٸلدٸ», - دەدٸ ول.
پرەمەر-مينيستر ورىنباسارىنىڭ ايتۋىنشا, مۇعالٸمدەردٸڭ جالاقىسى قاڭتار ايىنان باستاپ ورتا ەسەپەن 25-30 پايىزعا ٶسەدٸ. 4 جىلدىڭ ٸشٸندە 2,5 ەسە ارتادى. ال ٷكٸمەت قابىلداعان, بەكٸتكەن باعدارلامانىڭ ارقاسىندا مەكتەپكە دەيٸنگٸ جاستاعى بالالار بالاباقشامەن 100 پايىز قامتىلادى. 2025 جىلعا دەيٸن ٷش اۋىسىمدى, اپاتتى جاعدايداعى مەكتەپتەردٸڭ بارلىعى جويىلادى. مەكتەپتەر 100 پايىز ينتەرنەتپەن قامتاماسىز ەتٸلٸپ, ينتەرناتتار اشىلادى, قوسىمشا سپورت زالدار سالىنادى.
«ٶزدەرٸڭٸز بٸلەسٸزدەر, قازٸر سەناتتا مۇعالٸمدەردٸڭ مەرتەبەسٸ جٶنٸندەگٸ زاڭ جوباسى قارالىپ جاتىر. بٸزدٸڭ جوسپارىمىز بويىنشا ەرتەڭگٸ وتىرىستا ول قابىلداناتىن شىعار. ودان كەيٸن مەملەكەت باسشىسىنىڭ قول قويۋىنا جٸبەرٸلەدٸ», - دەدٸ بەردٸبەك ساپارباەۆ.
