«Ekinshi jyl qatarynan bizdiń birlesken jobalarymyz júzege asyrylyp jatyr. Sybailas jemqorlyqqa qarsy kúreste BǴM óz bastamalaryn usynyp, belsendilik tanytyp keledi. Sońǵy ýaqytta bilim salasynda ashyqtyq, aiqyndyq jáne obektivtiliktiń arqasynda oń ózgerister baiqalady. Bul Tuńǵysh Prezident – Elbasy men Memleket basshysynyń saiasaty, al qoiylǵan mindetti ministr oryndap jatyr. Jalpy sybailas jemqorlyq táýekelderdin joiý barysynda joǵary oqý oryndary qaýymdastyǵy, sarapshylar men tutastai alǵanda vedomstvo qyzyǵýshylyq tanytyp otyrǵanyn kórip otyrmyz. Bilim jáne ǵylym ministrine belsendi ustanymy úshin alǵys bildiremin», – dedi Alik Shpekbaev QR Bilim jáne ǵylym ministrligimen birlesken keńes barysynda.
Jiynda birlesken jobalardyń nátijeleri erekshe atap ótildi. Bul baǵytta azamattyq qoǵamdy jumyldyrýǵa basty nazar aýdarylǵan.
Onyń jarqyn mysaly retinde elimizdiń barlyq óńirinde magistratýraǵa túsý kezinde Agenttik pen Ulttyq testileý ortalyǵy birlesip júrgizgen monitoringti aitýǵa bolady. Monitoringke 500-den astam baqylaýshy qatysty. Nátijesinde daiyndyq deńgeii tómen ári akademiialyq adaldyqtan jurdai úmitkerler tizimge ilikpedi jáne memleket 2,7 mlrd teńge únemdedi.
«Halyqaralyq baǵdarlamalar ortalyǵy» AQ-daǵy («Bolashaq») syrtqy taldaý ortalyq qyzmetiniń túbegeili transformatsiialanýyna negiz boldy. Biznes-protsesterdi ońtailandyrý nátijesinde jyl saiyn 1,3 mlrd teńge biýdjet qarajaty únemdeletin bolady.
Qoǵamdyq monitoring sheńberinde qashyqtan oqytý kezinde kompiýterlerdi satyp alýǵa bólingen qarajatty úlestirý jónindegi komissiialardyń quramynda «Adaldyq alańy» óńirlik jobalyq keńseleri, Arnaiy monitoringtik toptardyń jáne Agenttiktiń aýmaqtyq bólimsheleriniń ókilderi boldy. «Baǵa – sapa» qaǵidaty boiynsha kompiýterlik tehnikany áleýetti jetkizýshilerdiń baǵa usynystaryn irikteý arqyly birlesken kúsh-jigermen shamamen 3,6 mlrd teńge únemdeldi.
«Biz QR Sybailas jemqorlyqqa qarsy is-qimyl agenttiginiń arnaiy monitoringtik tobynyń músheleri retinde aimaqtardy aralap, bilim salasyndaǵy jaǵdai jaqsaryp kele jatqanyn baiqadyq. Aýqymdy jumystar atqarylyp, barlyq protsess avtomattandyrylǵan. Bul sybailas jemqorlyq táýekelderin aitarlyqtai tómendetedi. Ministrlik arnaiy monitoringtik toptyń múshelerimen turaqty jumys jasap, jemqorlyq táýekelderin tómendetý úshin ádisterin usynyp keledi. Kóptegen óńirde jumysqa qabyldaý protsesi elektrondyq formatqa aýysyp jatyr», – dep atap ótti Agenttiktiń arnaiy monitoringtik tobynyń jetekshisi Aigúl Soloveva.
Bultty tehnologiialarǵa kóshý, pedagogterdi elektrondyq formatta attestattaýdan ótkizý sybailas jemqorlyq táýekelderin aitarlyqtai tómendetýge kómektesedi. Qujattardy qabyldaý, kolledjder men joǵary oqý oryndaryna túsý emtihandaryn ótkizý protsesteri avtomattandyrylyp jatyr. Bul sybailas jemqorlyq faktorlaryn joiýǵa múmkindik beredi.
«Aqsha stýdentpen birge júredi» júiesi ýniversitetter, kolledjder arasynda básekelestikti arttyryp, óz kezeginde bilim berý qyzmetteriniń sapasyn jaqsartýǵa yqpal etedi. 2021 jyly mektepke deiingi bilim berý salasynda da vaýcherlik júie engiziletin bolady. Iaǵni, budan bylai ata-ana vaýcherdi alyp, balasyn qai balabaqshaǵa beretinin ózi sheshedi.
«Problemalyq máseleler joq emes. Aitylǵan barlyq usynysty egjei-tegjeili taldap, jumys júrgizetin bolamyz. Táýekelderdi boldyrmaý úshin bizge ashyqtyqty tolyq qamtamasyz etý mańyzdy. Sybailas jemqorlyqqa qarsy is-qimyl boiynsha jumysty jalǵastyramyz», – dedi Bilim jáne ǵylym ministri Ashat Aimaǵambetov.
