Bilim salasynda tyń betburys jasaýdyń ýaqyty keldi. Osy oraida BQO bilim basqarmasy J.Dosmuhamedov atyndaǵy joǵary pedagogikalyq kolledjiniń direktory, pedagogika ǵylymdarynyń doktory Svetlana Bahisheva óz oi-tolǵamymen bylaisha bólisti, dep habarlaidy QazAqparat.
Onyń aitýynsha, Memleket basshysynyń qatysýymen ótken Ulttyq qoǵamdyq senim keńesiniń úshinshi otyrysynda bilim salasyna qatysty ótkir de mańyzdy máseleler ashyq aitylyp, onyń sheshilý joldary usynyldy.
Eń aldymen Prezidenttiń bilim berýdi «ekonomikanyń eń mańyzdy salasy» dep anyqtaýy bilim berý salasyna degen buǵan deiin qalyptasyp kelgen kózqarastyń túbegeili ózgerýin kórsetedi. Bul aldyńǵy qatarly damyǵan elderdiń «tabysty bolýynyń negizi – bilim salasyn ekonomikamen tikelei bailanystyrý» úrdisimen úndesedi. Bilim men aqparatqa bet alǵan qoǵamda bilim berý júiesi innovatsiialyq ekonomikanyń negizgi bóligi bolyp tabylady. Aqparattyq úderispen birge órlep kele jatqan jańa bilimdilikke suranys ekonomikalyq damýdyń jańa faktory retinde qalyptasýda.
Bilim sapasy turǵysynan qala men aýyl mektepteriniń arasynda alshaqtyqty boldyrmaý kerek, áleýmettik jaǵdailaryna, turǵylyqty jerine qaramastan beriletin bilim sapaly bolýy tiis delindi. Prezident kótergen shaǵyn jinaqty mektepterdi kásibi mamandarmen qamtamasyz etý pedagog kadrlar daiarlaityn oqý oryndaryna da mindetter júkteidi. Bul bir jaqty sheshiletin másele emes, atap aitqanda, birneshe mamandyq alýǵa múmkindik beretin baǵdarlamalar daiyndaý, mamandyqtar jikteýishine ózgerister endirýdi, pedagog kadrlar daiarlaýdyń jańa formatyn jasaýdy da qamtidy. Bulardyń búginde qolǵa alynyp jatqany týraly ministr Ashat Aimaǵambetov óz baiandamasynda aityp ótti.
«Jaǵymdy jańalyq retinde pedagog kadrlardy daiarlaýdyń jańa joly burynnan pedagogtyq bilimi joq basqa sala mamandaryna pedagogikalyq bilim berýdi qarastyrýdy aitar edik. Bul shetel oqý oryndarynda qalyptasqan úrdis. Mysaly, biz Kembridj ýniversitetiniń bilim baǵdarlamalarymen tanysqan kezde kez kelgen adam áýeli tehnikalyq nemese jaratylystaný baǵyttary boiynsha diplom alyp, keiin óz qalaýymen pedagogikalyq-psihologiialyq, ádistemelik daiyndyqtan ótken soń muǵalim bola alatynyn kórdik. Bul tájiribe Evropa elderinde keńinen taralǵan. Bizdiń jaǵdaiymyzda bul kezinde belgili bir mamandyq boiynsha diplom alyp, túrli sebeptermen jumyssyz otyrǵan joǵary, orta bilimdi mamandardy qosymsha oqytý shaǵyn jinaqty mektepterdiń maman jetispeýshilik máselesin sheshýdiń bir joly bolar edi», deidi pedagog.
Prezidenttiń bilim berýdi, sonyń ishinde, pedagogikalyq mamandyqtardyń baǵdarlamalaryn modernizatsiialaýda IT-quzyrettilikke, jańa tehnologiialar men arnaiy modýlder endirý týraly aitqandary da asa mańyzdy. J.Dosmuhamedov atyndaǵy pedagogikalyq kolledjde «Nazarbaev ziiatkerlik mektepteri» DBBU-men birlesip jasaǵan «Bastaýysh bilim berý» mamandyǵy boiynsha jańa bilim baǵdarlamasynda atalǵan arnaiy modýlder endirilip, «Aqparattyq quzirettilik», «Robottyq tehnika», «Jobalaý negizderi» «Emotsiialyq intellekt», t.b. jańa pánder engizilip otyr. Sonymen qatar bilim berý uiymdaryna «Kásibi standarttar» negizinde pánderdi tańdaý múmkindigin berýdi akademiialyq erkindiktiń bastamasy dep baǵalaýǵa bolady.
Memleket basshysy sondai-aq qashyqtan oqytý tásili jahandyq úrdis retinde qalyptasqanyn, álemniń kóptegen oqý oryndary bul ádisti keńinen qoldanatynyn jáne aldaǵy ýaqytta ony jetildirý qajettigin basa aitty. Pedagog mamandardyń bul pikirdi qýattaityny anyq. Basqalar siiaqty, BQO-nyń barlyq oqý oryndarynda osy úrdiske qiyndyq retinde emes, jańa múmkindikter men jańa resýrstardy damytý joly dep qarastyryp, biraz nátijelerge qol jetkizildi. Shyn máninde qashyqtan oqytý stýdentterdiń ózdiginen bilim alýy men óz bilimine jaýapkershiligin kúsheitse, pedagogtardyń tsifrlyq saýattylyǵyn jetildirýge sebep boldy.
«Alaida, búgingi kúni bul tehnologiianyń stýdentpen keri bailanys jasaý, interaktivtik jumys ádisterin, emtihan alýdyń testten basqa túrlerin qarastyrý turǵysynan jetildirý qajettigin kórdik. Jalpy alǵanda, qashyqtan oqytý pedagog mamandardy syrttai oqytý siiaqty formaldy túrinen únemi tikelei bailanysta jumys jasaýǵa múmkindik beretin, kadrlardy sapaly daiarlaityn, sybailas jemqorlyqty boldyrmaityn tiimdi oqý túri ekenine kózimiz jetýde. Endigi kezektegi jumystar – onyń ádisnamasyn jasaý, ádistemesin jańartý, resýrstardy jetildirý», deidi kolledj direktory.
Ulttyq keńes otyrysynda sonymen qatar Asylbek Qojahmetovtiń, Murat Ábenovtiń, Raýan Kenjehanulynyń, Saiasat Nurbektiń bilim salasyn jańartý týraly tujyrymdy oilary nazar aýdararlyq boldy. Ministr Ashat Aimaǵambetovtiń baiandamasyndaǵy osy salany damytýdaǵy irgeli oilary kordalanǵan kóp máselelerdiń sheshimi tabylatynyna senim uialatady.
«Budan basqa da Ulttyq keńes otyrysynda aitylǵan bilim salasynyń árbir satysyn jańartý joldary, ǵylymi kadrlardy daiarlaý, taǵylymdamaǵa joldaý, ǵylymi jobalar konkýrstaryn jyl saiyn júrgizý, doktoranttardyń, pedagogikalyq mamandyq stýdentteriniń stipendiiasyn arttyrý, oqytýshylardyń jalaqysyn kóterý, muǵalimder úshin arnaiy medal bekitý siiaqty kóptegen jaǵymdy jańalyqtar pedagog mártebesin kóterý tek zań qabyldaýmen ǵana shektelmei, Prezidenttiń únemi nazarynda ekenin kórsetedi. Jalpy, Ulttyq keńeste bilim men meditsina salasynda batyl da oń betburysqa jeteleitin tyń baǵyttar aityldy. Endi munyń oryndalýy da elimiz úshin asa mańyzdy bolmaq», dep túiindedi oiyn S.Bahisheva.
