Bilim oshaqtaryn óz paida kózine ainaldyrǵandardy laýazymyna qaramastan jaýapkershilikke tartý kerek. Bul týraly Májilistiń jalpy otyrysynda depýtat Berik Dúisenbinov aitty, dep habarlaidy QazAqparat.
«Aq jol» partiiasy ótken jyly Qazaq biliminiń qara shańyraǵy, qoǵamda zańdy rezonans týdyrǵan ál-Farabi atyndaǵy Qazaq ulttyq ýniversitetiniń tiesili jer telimderiniń aýmaǵy belgisiz sebeptermen azaiýyna bailanysty Bas prokýror men Bilim ministrine saýal joldaǵan bolatyn. Ókinishke qarai, elimizdiń aimaqtaryndaǵy memlekettik joǵary oqý oryndarynyń jerleri men ǵimarattarynyń da talan-tarajǵa túsip, «tistegenniń aýyzynda, ustaǵannyń qolynda» ketip jatqanyn aqparat quraldarynan estip, bilip jatyrmyz. Mysaly, men ózim oqyǵan Shyǵystaǵy Sársen Amanjolov atyndaǵy ýniversitettiń bas ǵimaratynan bes qadam jerde ornalasqan óndiristik sheberhana búginde bilimge eshqandai qatysy joq karaoke-barǵa ainalǵan», - dedi Berik Dúisenbinov QR Bas prokýrory Berik Asylov pen QR Bilim jáne ǵylym ministri Ashat Aimaǵambetovtyń atyna joldaǵan saýalynda.
Onyń aitýynsha, Bilim jáne ǵylym ministrligi óz jaýabynda ýniversitettiń (QazUÝ) jer teliminiń 0,779 gektarǵa azaiǵanyn rastaǵan.
«Al Bas Prokýratýranyń saýalymyzǵa bergen jaýabynda 2012 jylǵy 30 qańtardaǵy Almaty qalasy ákiminiń qaýlysyna sáikes, Ýniversitettiń jalpy kólemi 73,26 gektar jer paidalaný quqyǵyna berilgeni jáne oqý ornynyń jalpy jer kólemi 1,8 gektarǵa azaiǵanyn aita kelip, tekserýge bastamashylyq etý týraly məseleler prokýratýra organdaryna naqty oqý oryndary tarapynan zańdylyqty buzýshylyqtyń naqty faktileri týraly məlimetter túsken kezde qaralatynyn baiandaǵan edi. Sonda búginge deiin Ýniversitetke tiesili jer nege azaiǵany, oǵan kim jaýapty degen suraqqa ókiletti organdardan mardymdy jaýap bolmai, jumbaq kúiinde qalyp otyr. Mundai jaǵdailar tek Ulttyq ýniversitetpen ǵana shektelip júrgen joq. Ókinishke qarai, joǵarǵy oqý oryndarynyń jer telimderiniń jeke menshikke satylyp jatqanyn, stýdent jastar turatyn jataqhanalardyń azaiyp jatqany jasyryn emes», - dedi depýtat.
B. Dúisenbinov joǵarydaǵyny baiandai kele, myna usynystardy jasady:
– birinshiden, Qazaq ulttyq ýniversitetine tiesili jer aýmaǵynan jer ýchaskeleriniń bólinip shyǵarylǵany qanshalyqty zańdy ekenin tekserý;
– ekinshiden, elimizdiń barlyq aimaqtaryndaǵy memlekettik joǵarǵy oqý oryndaryna tiesili jer telimderine arnaiy tekserý júrgizý.
«Úshinshiden, tekserý barysynda zańsyzdyq anyqtalǵan jaǵdaida, alaiaqtardy, qala ne Ýniversitet basshysy bolsyn, jalpy kinálilerdi, bilim oshaqtaryn óz paida kózine ainaldyrǵan toǵysharlardy esh mansaby men laýazymyna qaramastan, katań jaýapkershilikke tartýdy talap etemiz jáne nátijesin bizge habarlaýlaryńyzdy suraimyz», - dedi depýtat.
